Bujumbura: Abakinnyi bitabiriye irushanwa rya Volley mu Rwanda baraye ku kibuga cy’indege

Sangiza iyi nkuru

Abakinnyi 12 muri 16 b’u Burundi bitabiriye irushanwa nyafurika rya Volleyball ryaberaga mu Rwanda hamwe n’umutoza wabo, baraye ku kibuga cy’indege mpuzamahanga cyitiriwe Melchior Ndadaye, i Bujumbura.

Ibitangazamakuru byo mu Burundi (Ikiriho na SOS) bivuga ko impamvu aba bakinnyi baraye ku kibuga cy’indege ari uko ishyirahamwe rishinzwe Volleyball mu Burundi ryanze kwishyura ikiguzi cy’ibipimo bya Covid-19 aba bakinnyi bafashwe.

Abakinnyi bane muri bo bafashe icyemezo cyo kwiyishyurira iki kiguzi, bemererwa kuva ku kibuga cy’indege, barataha, bagenzi babo barasigara.

U Burundi bwari bwarohereje amakipe abiri abuhagararira muri iri rushanwa; iy’abagabo yabaye iya 11 mu makipe 16 yari yitabiriye n’iy’abagore yabaye iya 7 mu makipe 8 yari yitabiriye.

Irushanwa ry’abagabo ryarangiye tariki ya 14, iry’abagore rirangira tariki ya 19 Nzeri 2021.