Major Christian Ngoy Kenga Kenga n’umurinzi we, Jacques Mugabo, bakatiwe badahari ku rwego rwa mbere igihano cy’urupfu n’Urukiko Rukuru rwa Gisirikare mu 2011 mu rubanza rw’iyicwa ry’impirimbanyi y’uburenganzira bwa muntu Floribert Chebeya (uri ku ifoto) n’umushoferi we Fidèle Bazana, kuri uyu wa Gatatu, itariki ya 22 Nzeri , 2021 baritaba ku nshuro ya mbere mu iburanisha mu ruhame muri gereza ya gisirikare ya Ndolo. Abaregwa bafashwe mu mwaka ushize nyuma y’imyaka 10 icyaha gikozwe bakidegembya.
Ibi ni ibivugwa mu imenyesha ryatanzwe n’Urukiko Rukuru rwa Gisirikare rwa RDC, ryandikiwe sosiyete sivile, ryashyizweho umukono na Colonel Jacques Ndjoku wa Ndjoku.
Uru rubanza ruje nyuma y’ubujurire bwatanzwe n’abaregwa, Major Ngoy Kenga Kenga na Komiseri wungirije wungirije Jacques Mugabo ku rubanza RP N ° 066/10 rwaciwe n’urukiko rwa gisirikare rwa Kinshasa / Gombe.
Christian Ngoy, wari Komiseri mukuru wa polisi, yari yaracitse ubutabera kuva ubwo bwicanyi bubiri bwaba, akaba yarafashwe muri Nzeri 2020 i Lubumbashi, mu gihe undi wari waracitse, nawe wahoze ari umupolisi warindaga uyu wa mbere, Jacques Mugabo, yatawe muri yombi muri uyu mwaka wa 2021.
MediaCongo ivuga ko aba bombi bari hafi ya Gen. John Numbi Banza Tambo, wari umugenzuzi mukuru wa polisi, ufatwa nk’uwategetse iyicwa rya Chebeya na mugenzi we, akaba amaze amezi arenga atatu nawe ashakishwa n’ubutabera.
Imiryango isaga 100 yo mu gihugu na mpuzamahanga ni yo yashyizeho igitutu kuri Perezida wa Repubulika, Félix Tshisekedi, kugira ngo urubanza ku iyicwa rya Chebeya mu 2010 n’umushoferi we, Fidèle Bazana, rusubukurwe.
