Abasirikare bakuru 11 ba FARDC kuri uyu wa Kane batangiye kuburanishwa n’Urukiko rwa Gisirikare rwa Goma, muri Kivu y’Amajyaruguru ku cyaha cyo kugerageza guha ruswa abagenzuzi ba gisirikare bari bagiye kubakoraho iperereza ku inyerezwa ry’amafaranga yari agenewe ibikorwa bya gisirikare muri ibi bihe muri iyi ntara hari ubuyobozi bwa gisirikare.
Umunyamakuru wa Radio Okapi aravuga ko muri iryo genzura ryakozwe n’Umugebnzuzi Mukuru wa FARDC, abasirikare bakuru 8 batawe muri yombi muri Kanama kubera kunyereza umutungo, gutanga inyemezabwishyu z’umurengera no kongera umubare w’abasirikare bo mu karere ka gisirikare ka 34 bagashyiramo aba baringa.
Mu basirikare batawe muri yombi bagashyikirizwa ubutabera, harimo Komanda w’ibirindiro bishinzwe ibikoresho mu karere, umuyobozi ushinzwe ibikoresho mu karere ka gisirikare ka 34, ushinzwe ibikoresho mu bikorwa bya gisirikare bya Sokola 2 n’umuyobozi w’ibiro bishinzwe ibijyanye n’izabukuru mu karere ka gisirikare ka 34.
Intara za Kivu y’Amajyaruguru na Ituri zikaba zarashyizwe mu maboko y’igisirikare mu kwezi kwa Gicurasi hagamijwe kurandura burundu ibikorwa by’imitwe yitwaje intwaro ikomeje guhungabanya umutekano muri iki gice cya Repubulika ya Demokarasi ya Congo.
