U Rwanda rwageze ku ntego mpuzamahanga y’ukwezi kwa Nzeri yo gukingira Covid-19 abagera ku 10% bya miliyoni 12,9 z’abaturage barwo ndetse ubu rukaba ruri mu bihugu Umuryango w’Ubumwe bw’u Burayi uvuga ko byagendwa nta kwikanga.
U Rwanda rumaze gukingira 2,029,038 by’abaturage barwo bamaze kubona doze ya mbere, naho 1,466,966 bari bamaze kubona doze zose ku itariki ya 24 Nzeri. Muri Kanama u Rwanda nibwo rwatangije ibikorwa byo gukingira abaturage bari hejuru y’imyaka 18 mu Mujyi wa Kigali.
Nk’uko byemezwa n’Ishami ry’Umuryango w’Abibumbye ryita ku Buzima, OMS, u Rwanda rumaze kwakira kugeza ubu doze miliyoni 3,4 z’inkingo. Muri izi rumaze gutanga miliyoni 3,3 no gukingira 10% by’abaturage barwo.
Kuwa Kane, Ikigo cya Afurika gishinzwe kugenzura indwara z’ibyorezo no kuzikumira cyavuze ko ibihugu bya Afurika bimaze kubona doze miliyoni 181,2 z’inkingo za Covid-19.
Iki kigo kivuga ko 4,06% gusa by’Abanyafurika ari bo bamaze kubona doze zose z’urukingo. Miliyoni 136,3 z’inkingo muri miliyoni 181,2 ni zo zimaze gutangwa kugeza ubu.
