Ubuyobozi bw’Intara bw’Ikigega cy’Igihugu gishinzwe Ubwiteganyirize bw’abakozi (CNSS) Katanga III bufite icyicaro i Kolwezi gifite Umuyobozi mushya. Yitwa Alain Sekimonyo Mutuze. Ihererekanyabubasha n’umuyobozi ucyuye igihe, Clete Kapend Kabeya, ryabaye kuwa Gatanu ushize, itariki ya 5 Ugushyingo 2021 riyobowe n’umuyobozi ushinzwe abakozi muri CNSS, Auguy Kalambayi Opola.
Mu gushyira mu bikorwa icyemezo cyo gushyiraho abayobozi mu buyobozi bw’intara, inama y’ubutegetsi ya CNSS yasabwe gushyiraho abayobozi bashya. Muri urwo rwego, Alain Sekimonyo Mutuze abaye Umuyobozi ku rwego rw’intara wa CNSS Katanga 3. Azaba yungirijwe na Tshitamba Kazadi nk’umuyobozi wungirije ushinzwe tekinike kimwe na Nawej Ngwej nk’umuyobozi wungirije ushinzwe imari n’ubuyobozi.
Akimara kwicara ku ntebe ye nk’umuyobozi ku rwego rw’intara wa CNSS Katanga 3, Alain Sekimonyo yashimiye Ubuyobozi Bukuru n’Inama y’Ubuyobozi ku bw’icyizere yagiriwe nk’uko iyi nkuru dukesha Politico.cd ikomeza ivuga.
Alain Sekimonyo yiyemeje gukomeza umuvuduko wa Clete Kabeya wamubanjirije, washinzwe Ubuyobozi bwa CNSS Katanga 2 i Likasi.
Ati “Ihame ryacu ni ukubanza kugumana inyungu twabonye no kuzifata nk’intangiriro. Noneho, tukagerageza gukora byinshi ku bufatanye bwa bose, ku nyungu z’ikigega ndetse no ku bagenerwabikorwa na gahunda rusange y’ubwiteganyirize muri RDC “.
Alain Sekimonyo Mutuze akaba ari umwe mu Banyekongo bavuga ururimi rw’Ikinyarwanda bashyizwe mu mwanya wo hejuru mu rwego rw’ingenzi mu gihugu rw’ubwiteganyirize bw’abakozi.
