Kuri uyu wa mbere, ishami ry’ubutabera ryatangaje ko Abanyekongo babiri batawe muri yombi muri Amerika bakurikiranweho gucuruza amahembe y’inzovu n’amahembe y’inkura zera bayakura muri Repubulika ya Demokarasi ya Congo bayajyana Seattle muri Leta ya Washington.
Iri shami ryagize riti: “Herdade Lokua w’imyaka 23 na Jospin Mujangi w’imyaka 31 bakomoka i Kinshasa, muri Repubulika ya Demokarasi ya Congo, batawe muri yombi ku ya 3 Ugushyingo hanze ya Seattle.”
Ku ya 4 Ugushyingo, aba bashinjwe ibyaha birimo ubugambanyi, iyezandonke, magendu no kurenga ku mategeko kubw’ubucuruzi butemewe.
Inyandiko y’ibirego 11 ivuga ko Lokua na Mujangi bakoranye n’umuhuza (komisiyoneri) kugira ngo binjize muri Amerika imizigo ine.
Minisiteri y’ubutabera (DOJ) yavuze ko muri Kanama na Nzeri 2020, abaregwa ngo bohereje imizigo itatu mu ndege irimo ibiro 49 by’amahembe y’inzovu yaruhukiye muri Seattle.
Muri Gicurasi, ngo bohereje undi muzigo w’ibiro nka bitanu by’amahembe y’Inkura. Ishami rivuga ko umuguzi yishyuye abaregwa amadorari 14.500 ku mahembe y’inzovu na 18,000 $ ku mahembe y’inkura.
Ibiro Ntaramakuru by’Abongereza dukesha iyi nkuru bivuga ko bitashoboye guhita bivugana n’abunganira Lokua na Mujangi ngo bagire icyo batangaza ku biregwa abakiriya babo.
Gusa, Minisiteri y’Ubutabera yavuze ko nibaramuka bahamwe n’icyaha, abaregwa bashobora guhanishwa igifungo cy’imyaka 20 kubera ibyaha bya magendu n’iyezandonke ndetse n’imyaka itanu kubera ubugambanyi no kurenga ku itegeko rya Lacey. Itegeko rya Lacey ribuza, ibikorwa birimo guhishira iyoherezwa ry’imizigo irimo ibikomoka ku nyamanswa.
