Ubuyobozi bw’akarere ka Kisoro muri Uganda buvuga ko bwakiriye Abanyekongo bahungaga imirwano yaberaga muri Teritwari ya Rutshuru, Intara ya Kivu y’Amajyaruguru muri Repubulika ya Demukarasi ya Congo (RDC) bashobora kuba barenga 10,000.
Komiseri wa Kisoro ushinzwe umutekano, Capt. Peter Mugisha kuri uyu wa 8 Ugushyingo 2021 yatangarije Daily Monitor ko kugeza saa kumi n’imwe z’igitondo, bari bamaze kwakira Abanyekongo barenga 4,000, binjiye banyuze ku mupaka wa Bunagana no mu nzira z’ubusamo.
Rukundo Manasseh uyoboye komisiyo ishinzwe kwita ku mpunzi no guhangana n’ibiza muri Kisoro nyuma ya saa sita yamenyesheje ibiro ntaramakuru by’Abafaransa ati: “Impunzi ziri kuza ku bwinshi, zigera mu 5000. Izindi ziracyaza.”
Abel Bizimana uyoboye aka karere, yavuze ko mu gihe bitegura kujyana aba Banyekongo mu nkambi y’agateganyo ya Nyakabande, hari abandi bategereje kwambuka barenga 10,000. Ati: “Umubare w’Abanyekongo bari ku mupaka wa Bunagana ni munini cyane. N’ubwo tutababaze, ndagereranya ko baba bagera ku 10,000 cyangwa bakarenga.”
Mu rukerera rwo ku wa 8 Ugushyingo 2021, umutwe witwaje intwaro utaramenyekana wagabye igitero mu duce twa Chanzu, Kiisiza, Ruyoni na Mbuzi muri Rutshuru, birukanamo abasirikare ba RDC bake bari bahafite ibirindiro.
Leta ya RDC yemeza ko uyu mutwe ari M23 wari wararambitse intwaro mu 2013, gusa na wo mu itangazo washyize hanze, wabihakanye.
