Polisi y’u Rwanda ibifashijwemo na Interpol yafashe ibikoresho n’ibiribwa bitujuje ubuziranege

Kuva ku itariki ya 15 kugeza kuya 16 Ukuboza 2016, ibihugu bihuriye mu muryango uhuza Polisi mpuzamahanga (Interpol) byo mu muryango uhuza abayobozi bakuru ba za Polisi zo mu bihugu 13 byo mu burasirazuba bwa Afurika (EAPCCO), byakoreye rimwe umukwabu wiswe “Operation FAGIA-OPSON II” wo gufata no gukura ku isoko ibikoresho, ibiribwa n’ibinyobwa by’ibyiganano byinjiye mu bihugu mu buryo butemewe n’amategeko, ibitujuje ubuziranenge n’ibitemewe, hagamijwe kurinda ubuzima bw’abaturage b’ibyo bihugu n’ubukungu bwabyo.

Mu Rwanda, uyu mukwabu ukaba warabereye mu Mujyi wa Kigali harimo n’ikibuga cy’indege, ndetse no ku mipaka ahashobora kuboneka biriya bicuruzwa, ukaba warakozwe ku bufatanye bwa Polisi y’u Rwanda n’abafatanyabikorwa batandukanye barimo Minisiteri y’ubuhinzi, Minisiteri y’ubuzima, Ikigo cy’igihugu gishinzwe ubuziranenge (RBS) , ikigo cy’igihugu gishinzwe ubuvuzi (RBC) , Ikigo cy’igihugu gishinzwe imisoro n’amahoro(RRA) n’urugaga rw’abikorera ku giti cyabo (PSF).
Umuyobozi w’ishami rishinzwe ibikorwa muri Polisi y’u Rwanda Commisssioner of Police (CP) Emmanuel Butera, ubwo yavugaga uko uyu mukwabu wagenze n’ibyo wagezeho kuri uyu wa gatanu tariki ya 16 Ukuboza, yavuze ko n’ubwo uyu mukwabu wabaye mu minsi 2, Polisi y’u Rwanda yo ihora iyikora.
[xyz-ihs snippet=”google-pub”]

Yavuze ati:”Uyu mukwabu twawukoreye rimwe mu bihugu bigize EAPCO, ariko muri rusange Polisi zigize ibi bihugu zihora mu mikwabu nk’iyi yo kubifata mu bikorwa byazo bya buri munsi.”
Yakomeje avuga ati:” Iki gikorwa icyo cyari kigamijwe ni ukurinda ubuzima bw’abantu batuye muri aka karere , kurwanya abagizi ba nabi bakora ibintu bitujuje ubuziranenge, kwigana, gucuruza ibintu byangiza ubuzima bw’abantu, ndetse bikanasubiza inyuma ubukungu bw’igihugu.”

Yasabye ko kurwanya ibintu bitujuje ubuziranenge buri wese yabigiramo uruhare, kandi ko Polisi y’u Rwanda itazahwema gufata ibikoresho, ibiribwa n’ibinyobwa by’ibyiganano, ibyinjiye mu bihugu mu buryo butemewe n’amategeko, n’ibitujuje ubuziranenge.
Umuyobozi w’ishami rihuza ibikorwa bya Polisi mpuzamahanga(Interpol) muri Polisi y’u Rwanda, Assistant Commissioner of Police (ACP) Peter Karake, yavuze ko uyu mukwabu wakozwe mu rwego rwo guca ibikoresho, ibiribwa n’ibinyobwa by’ibyiganano, ibitujuje ubuziranenge n’ibitemewe.

ACP Karake akaba yagize ati:”Ibikoresho, ibiribwa n’ibinyobwa bitujuje ubuziranenge n’ibyinjiye mu gihugu mu buryo butemewe n’amategeko bigira ingaruka mbi ku buzima bw’abaturage no ku bukungu bw’igihugu.
Urugero ni aho twafashe imiti y’imyiganano yacuruzwaga muri za Farumasi, kandi yashoboraga kugurwa n’abaturage bazi ko bagiye kwivuza nyamara ntacyo iri bubamarire, ahubwo ishobora kubongerera uburwayi.”

Yavuze ko ibikoresho nk’ibyo bitujuje ubuziranenge binateza impanuka zihitana abantu. Aha akaba yatanze urugero rw’inkongi z’umuriro zari zimaze iminsi zivugwa mu gihugu, ahanini zaterwaga n’insinga z’amashanyarazi zitujuje ubuziranenge abantu bubakisha.
Aha akaba yanagize ati:” Ibi bikoresho bitujuje ubuziranenge biri ku isoko, kuko ibyerekanywe byafatiwe aho bicururizwa nyir’izina nta n’ugombye kujya mu bubiko(stock) bw’abacuruzi.”
[xyz-ihs snippet=”google-pub”]

ACP Karake yaboneyeho gusaba abaturarwanda ngo barusheho kuba maso birinda ibintu nk’ibi byashyira ubuzima bwabo mu kaga kandi bigira ingaruka ku bukungu bw’igihugu, ko bakwiye kujya baha Polisi amakuru y’aho ibi bintu biri kandi asaba abantu barangura bakanacuruza ibi bintu ko nta mahwemo bazabona kuko Polisi y’u Rwanda yashyizeho umutwe ukora imikwabu nk’iyi mu buryo buhoraho, ko mu rwego rwo kwirinda ibihombo , babireka.
Umuyobozi w’ubugenzuzi bw’ibitumizwa mu mahanga mu kigo cy’igihugu gishinzwe ubuziranenge RBS, Bwana Rukundo Olivier yavuze ko ibi bikoresho bitujuje ubuzirange bifite inkurikizi mbi ku buzima bw’abantu; aho inzoga ziteza indwara nka kanseri, impyiko n’izindi, amavuta akaba ateza indwara z’uruhu, naho imiti ikangiza ubudahangarwa bw’umubiri.

Mu byafashwe harimo ibiribwa, ibinyobwa n’inzoga zitandukanye, amavuta yo kwisiga, imiti yo kwa muganga, imiti ikoreshwa mu buhinzi, byose hamwe bikaba bifite agaciro k’amafaranga y’u Rwanda angana na miliyoni 140, 615,292.
Ingingo ya 377 yo mu gitabo cy’amategeko ahana mu Rwanda ivuga ko umuntu wese ukora icyaha cy’iyigana, ahanishwa igifungo kuva ku myaka ibiri (2) kugeza ku myaka itanu (5) n’ihazabu y’amafaranga y’u Rwanda kuva kuri miliyoni ebyiri (2.000.000Frw) kugeza kuri miliyoni icumi (10.000.000Frw). Uyu mukwabu FAGIA OPSON II ukaba warabaye nyuma y’’indi yabaye mu myaka 2 ishize.
Kanda hano ujye ubona amakuru yihuse kandi kugihe kuri Facebook no kuri twitter
@Bwiza.com