Inkingo zihari za Covid-19 bivugwa ko zitazabasha guhangana n’ubwoko bushya bwagaragaye bw’iki cyorezo bwiswe, Omicron, nk’uko byatangajwe n’uruganda rukora inkingo rwo muri Amerika rwitwa Moderna ruvuga ko bizafata andi mezi kugirango hakorwe urukingo rwakora.
Stephane Bancel yabwiye ikinyamakuru The Financial Times mu kiganiro cyashyizwe ahagaragara kuri uyu wa Kabiri, ko imibare ku bushobozi bw’inkingo zihari ubu izajya ahagaragara mu byumweru bibiri biri imbere.
Kuri uyu wa Mbere, itariki 29 Ugushyingo, Ishami ry’Umuryango w’Abibumbye ryita ku Buzima, OMS, ryaburiye Isi ko ibyago byo gukwirakwira byihuse kw’iki cyorezo biri hejuru.
Kuri ubu ahantu ubu bwoko bwa Omicron buheruka kugaragara ni mu Kirwa cya Reunion, gifatwa nk’Intara y’u Bufaransa.
Umushakashatsi Dr Patrick Mavingui wemeje ko hari umuntu wasanzwemo Omicron. Avuga ko ari umugabo w’imyaka 53 wari wakoreye urugendo muri Mozambique, agaca no muri Afurika y’Epfo.
Uyu mugabo wasubiye muri La Reunion mu byumweru bibiri bishize ubu ari mu kato nk’uko Mavingui yabitangarije ikinyamakuru cyo mu Bufaransa.
Ibihugu bimaze kugaragaramo Omicron
Australia: 2
Austria: 1
U Bubiligi: 1
Botswana: 19
Canada: 3
Czech Republic: 1
Denmark: 2
U Budage: 3
Hong Kong: 3
Israel: 1
U Butaliyani: 1
U Buholandi: 13
Portugal: 13
Afurika y’Epfo: 77
Espagne: 1
U Bwongereza: 9
