Urukiko Rukuru rwa Gisirikare rwagabanyije ibihano by’igifungo byahawe abasirikare babiri bahamwe n’icyaha cyo kugirira nabi abaturage bo mu mudugudu wa Kangondo 2, mu Kagali ka Nyarutarama mu Murenge wa Remera mu Karere ka Gasabo, muri Werurwe 2020.
Mu ntangiriro, uru rubanza rwarimo abasirikare batanu hamwe n’abasivili babiri, ariko ubushinjacyaha bwa gisirikare bwahagaritse ibirego bitatu by’abasirikare.
Ibirego byagumijweho ku basirikare Fidele Nishimwe na Patrick Ndayishimiye, hamwe n’abasivili babiri, Diane Mukamulisa na Donart Nakaziraho (abashinzwe umutekano ku rwego rw’ibanze).
Abashinjwa babanje gukurikiranwaho ibyaha byinshi birimo gufata ku ngufu, ubujura, ndetse no gukubita no gukomeretsa abantu ubwo bari mu irondo rya nijoro ku matariki atandukanye muri Werurwe umwaka ushize.
Mu Kwakira umwaka ushize, urukiko rwa gisirikare rwakuyeho ibyaha byo gufata ku ngufu, ubufatanyacyaha mu gufata ku ngufu n’ubujura, kubera ko ubushinjacyaha butagaragaje ibimenyetso bihagije bibahamya ibyo byaha.
Icyakora, urukiko rwasanze Ndayishimiye ahamwa n’icyaha cyo gukubita no gukomeretsa abantu, maze rumukatira igifungo cy’imyaka 3.
Nishimwe, Nakaziraho na Mukamulisa bahamwe n’icyaha cyo kurebera icyo cyaha bakatirwa igifungo cy’umwaka umwe.
Nyuma y’urubanza, ubushinjacyaha n’abaregwa bombi bajuririye mu rukiko rukuru rwa Gisirikare.
Abaregwa mu bujurire bavuze ko bahawe ‘ibihano birenze ‘ mu rukiko rw’ibanze.
Mu cyemezo cy’ubujurire urukiko rukuru rwa Gisirikare rwatanze ku wa gatatu, tariki ya 1 Ukuboza, umucamanza uyoboye urubanza yakomeje kwemeza ko nta bimenyetso bihagije byemeza abaregwa gufata ku ngufu, ubujura n’ubufatanyacyaha mu gufata ku ngufu.
Hano, nk’urugero, yavuze ko abashinjacyaha bananiwe gutanga ibimenyetso bivuguruza ibishinjura Nishimwe ko yari mu kigo arwaye hagati y’itariki 14 na 25 Werurwe, igihe bivugwa ko habaye gufata ku ngufu.
Byarangiye umucamanza agabanyije igihano cya Ndayishimye kugeza ku mezi atanu y’igifungo n’ihazabu y’amafaranga 500.000, kubera ko icyaha cyo gukubita no gukomeretsa nta ngaruka zikomeye cyagize ku bahohotewe.
Urukiko rwazirikanye kandi ko yicujije kuva igihe hakorwaga iperereza kandi akaba ataragoranye mu rubanza.
Abandi baregwa batatu bakatiwe igifungo cy’amezi 6.
Ku nyandiko yihariye, igifungo cya Mukamulisa cyasubitswe umwaka umwe kubera ko afite umwana muto arera.
