Kuri uyu wa Kane Twitter yatangaje ko yafunze konti hafi 3500 zanyuzwagaho icengezamatwara rya za guverinoma mu bihugu bitandatu birimo Uganda, u Bushinwa n’u Burusiya.
Ibindi bihugu konti nyinshi twitter ivuga ko zinyuzwaho poropaganda za guverinoma ni Mexico, Tanzania, na Venezuela.
Muri Afurika konti 268 zafunzwe kubera kwibasira itsinda ry’impirimbanyi z’uburenganzira bwa muntu muri Tanzania ryita Fichua, mu gihe 418 muri Uganda zishinjwa gukwiza icengezamatwara rishyigikira Museveni.
Nyinshi muri konti zafunzwe ni izo mu Bushinwa zifitanye isano n’ishyaka riri ku butegetsi zarwanyaga ibivugwa ku kuntu leta ifata abaturage b’Aba-Uyghur muri Xinjiang nk’uko iyi nkuru dukesha France24 ivuga.
U Bushinwa bukaba bushinjwa ibyaha bikomeye byo gukandagira uburenganzira bwa muntu bukorerwa abo ba nyamucye bo mu ntara yo mu majyaruguru y’uburengerazuba, aho impuguke zivuga ko abasaga miliyoni imwe bafungiye mu nkambi nk’izafungirwagamo Abayahudi mu Ntambara y’Isi ya Kabiri.
Usibye konti 2,048 zegereye guverinoma y’u Bushinwa zafunzwe, Twitter yanafunze izindi 112 zifitanye isano n’ikigo Changyu Culture, cyegereye guverinoma y’intara ya Xinjiang.
Iki cyemezo kije nyuma y’aho Meta ifite facebook na yo yatangaje ko yafunze konti 500 zakoreshwaga muri poropaganda za guverinoma y’u Bushinwa ku bijyanye na Covid-19.
Izi konti ngo zagiye zikwiza amakuru zikesha umuhanga mu by’ibinyabuzima w’Umusuwisi, wa baringa, witwa Wilson Edwards, avuga ko Leta Zunze Ubumwe za Amerika zitambika imbaraga zishyirwa mu gushaka kumenya inkomoko ya coronavirus.
Itangazamakuru rya leta mu Bushinwa ryagiye rivuga ibyavuzwe na Edwards muri Nyakanga nubwo ibinyamakuru byinshi byaje gusiba inkuru bamuvuzemo nyuma y’aho Ambasade y’u Busuwisi itangarije ko uwo muntu ntawe ubaho.
Yaba Twitter na Facebook ntabwo bikoreshwa mu Bushinwa, ariko leta ikoresha izi mbuga nkoranyambaga zo muri Amerika mu kugaragaza aho ihagaze ku ruhando mpuzamahanga.
Twitter kandi yahagaritse konti 16 zifitanye isano n’Ikigo cy’Ubushakashatsi mu bya Internet cyo mu Burusiya gikunze gukwirakwiza poropaganda za guverinoma kuri internet cyane cyane ku kijyanye n’uruhare rwayo muri Centrafrica.
U Burusiya bukaba bukomeje gushinga imizi muri iki gihugu kuva mu 2018 ubwo bwoherezaga abarimu ba gisirikare bo gutoza igisirikare cyacyo. Aba banajyanye n’umutwe w’abacanshuro ba Wagner Group.
Twitter yagize iti “ Twanakuyeho kandi urusobe rwa konti 50 zibasiye guverinoma ya gisivili ya Libya hamwe n’abantu bayishyigikiye, ari na ko bashyigikiye cyane u Burusiya muri Libya na Syria.
Hanafunzwe konti 276 zishyigikiye guverinoma muri Mexico, na 277 zikwirakwiza poropaganda za guverinoma.
Kimwe n’ibindi bihangange mu mbuga nkoranyambaga, Twitter yagiye inengwa kunanirwa gukemura ikibazo cy’amakuru atari yo ku rubuga rwayo ndetse n’ubutumwa bw’ivangura rishingiye ku gitsina, n’ubwibasira abaryamana bahuje ibitsina, n’ubundi butumwa bubiba urwango.
Yatangaje kandi ku wa kane ko izatangiza “Twitter Moderation Research Consortium” mu ntangiriro z’umwaka utaha, izahuza “impuguke ziturutse mu makaminuza, sosiyete sivile, imiryango itegamiye kuri Leta ndetse n’itangazamakuru” kugira ngo bige ku iterambere rishoboka.
Twitter yavuze ko itazagira ijambo mu bizava mu myanzuro ya ‘consortium’.
