Umutoza mukuru wa El-Magd SC iri mu cyiciro cya kabiri cya shampiyona y’umupira w’amaguru mu Misiri, Adham El-Selhedar yapfuye ubwo yishimiraga igitego.
Iyi mpanuka yabaye kuri uyu wa 2 Ukuboza 2021 ubwo El-Magd yari imaze gutsina Al-Zarka igitego cy’intsinzi mu minota y’inyongera; kuko iminota 90 yari yarangiye amakipe yombi anganya ubusa ku bundi (0-0).
Iki gitego cyatumye Umutoza Adham yishimira iki gitego, nyuma y’iminota mike umutima urahagarara, yikubita hasi.
Imbangukiragutabara yahise imukura kuri sitade, imwihutana ku ivuriro rya Alexandria kugira ngo abaganga bazobereye mu ndwara z’umutima batabare ubuzima bwe, ariko akigezwayo basanze yamaze gupfa.
Ibitangazamakuru byo mu Misiri bivuga ko Adham ataratangira gutoza yamaze igihe kinini akinira Ismaily SC iri muri shampiyona y’icyiciro cya mbere, ayifasha gutwara ibikombe bya shampiyona n’iby’igihugu.
