Ikigo gishinzwe ubushakashatsi ku mahoro cy’i Stockholm (SIPRI) cyatangaje ko kugurisha intwaro na serivisi za gisirikare by’amasosiyete 100 akomeye ku Isi byinjije miliyari zigera kuri 531 z’amadorari mu mwaka wa 2020, bikiyongeraho 1,3% ugereranije n’umwaka ushize.
Iki kigo cyo muri Suwede cyavuze ko umwaka wa 2020 wabaye umwaka wa gatandatu wikurikiranya w’izamuka ry’igurisha ry’ibigo 100 bya mbere, ndetse bikaba no mu gihe ubukungu bw’Isi bwagabanutse ahanini bitewe n’ingaruka za Covid-19.
Muri rusange igurisha ryiyongereyeho 17% ugereranije no muri 2015 igihe bwa mbere urutonde ryashyizemo amakuru ku bigo by’Abashinwa.
Ku wa mbere, Alexandra Marksteiner, umushakashatsi muri gahunda ya SIPRI yo gukoresha amafaranga no gukoresha intwaro, yagize ati: “Ibihangange mu nganda byakingiwe ahanini na guverinoma zisaba ibicuruzwa na serivisi.” Ati: “Mu bihugu byinshi, amafaranga yakoreshejwe mu gisirikare yariyongereye ndetse na guverinoma zimwe na zimwe zihutisha kwishyura inganda z’intwaro hagamijwe kugabanya ingaruka z’ikibazo cya Covid-19.”
Ibigo byo muri Leta Zunze Ubumwe za Amerika bikomeje kuyobora uruganda rw’intwaro, hamwe n’igurisha ryageze kuri miliyari 285 z’amadolari mu bigo 41 bingana na 54% by’igurishwa ry’intwaro mu masosiyete 100 akomeye ku Isi. SIPRI yavuze ko amasosiyete atanu ya mbere ku rutonde kuva mu 2018 yose ari ayo muri Amerika.
Iyi nkuru dukesha Al Jazeera ikomeza ivuga ko kugurisha intwaro ku masosiyete akomeye yo mu Bushinwa byinjije agera kuri miliyari 66.8 z’amadolari muri 2020, hiyongeraho 1.5% ugereranije na 2019.
Ibigo by’Abashinwa bigize 13% by’Ibigo 100 bya mbere byagurishije intwaro zose, imbere y’u Bwongereza, bwari bufite umugabane wa gatatu munini.
Umushakashatsi mukuru wa SIPRI, Nan Tian yagize ati: “Mu myaka yashize, amasosiyete y’intwaro yo mu Bushinwa yungukiwe na gahunda yo kuvugurura igisirikare mu gihugu kandi yibanda ku guhuza ibikorwa hagati y’igisirikare n’igisivili.”
Ati: “Babaye bamwe mu bakora ikoranabuhanga rya gisirikare rigezweho ku isi.”
SIPRI kandi ivuga ko amasosiyete 26 acuruza intwaro yo mu Burayi mu 100 ya mbere (Top 100) afatanije yihariye 21% by’igurishwa ry’intwaro zose, ni ukuvuga miliyari 109 z’amadolari.
Amasosiyete arindwi yo mu Bwongereza yagurishije intwaro zingana na miliyari 37.5 z’amadolari muri 2020, yiyongereyeho 6.2% ugereranije na 2019. Igurishwa ry’intwaro rya BAE Systems, isosiyete imwe rukumbi y’i Burayi iza mu 10 za mbere, yiyongereyeho 6,6% igeza kuri miliyari 24$.
Hagati aho igurisha ry’amasosiyete y’Abafaransa ryagabanutseho 7.7% mu gihe hagabanutse itangwa ry’indege za Rafale zikorwa na Dassault, nk’uko SIPRI ibitangaza. Gusa, Dassault muri uyu mwaka wa 2021 ifite amasezerano yo kugurisha UAE indege za yo zigera kuri 80 kuri miliyari 19$.
Uruganda rukora intwaro, Thales, narwo igurisha ryagabanutseho 5.8%, ibyo bikaba byaratewe n’ihungabana ryatewe n’icyorezo.
