Mu duce dutandukanye tw’Umujyi wa Goma kuri uyu wa Gatanu, itariki 17 Ukuboza 2021 hadutse imyigaragambyo simusiga yamagana iyicwa ry’abantu batanu bishwe mu ijoro rimwe ryakeye kuri uyu wa Kane. Imyigaragambyo yabereye mu duce twa Katoyi, Kyeshero na Ndosho, aho abaturage bashinze za bariyeri bamagana ubwo bwicanyi bwakozwe n’abajura bitwaje intwaro.
Muri Kyeshero nk’urugero, ahategerwa bus mu gace ka Katindo niho abigaragambya bateraniye bamagana iyicwa ry’abantu babiri bishwe mu ijoro ryo kuri uyu wa Kane, itariki 16 Ukuboza biciwe muri butike n’abajura bitwaje imbunda bakomerekeje abandi bantu.
Mu gace ka Katoyi, mu majyaruguru ya Goma, mu gitondo cyo kuri uyu wa Gatanu abigaragambya bashinze bariyeri bigaragambiriza iyicwa ry’umuntu wishwe arashwe n’amabandi.
Mu birometero bicye hafi yaho, mu gace ka Ndosho, mu burengerazuba bw’uyu murwa mukuru wa Kivu y’Amajyaruguru, abaturage naho bagerageje gufunga imihanda bamagana iyicwa ry’abantu babiri bishwe mu ijoro ryo kuri uyu wa Kane.
Mu mpande zose, abashinzwe umutekano bari barimo gukwirakwizwa ngo bagarure ituze muri utwo duce nk’uko iyi nkuru dukesha Actu7.cd ikomeza ivuga.
