Umutwe witwaje intwaro wa RED Tabara urwanya ubutegetsi bw’u Burundi uvuga ko wiciye abasirikare batanu (5) b’iki gihugu n’abapolisi barindwi (7), ukomerekereza n’abandi benshi mu gitero wabagabyeho hafi y’umupaka wa Gatumba/Uvira ugihuza na Repubulika ya Demukarasi ya Congo (RDC).
Uvuga ko wagabye iki gitero kuri uyu wa 19 Ukuboza 2021, kimara isaha imwe, ngo “abasirikare n’abapolisi b’u Burundi babuze umwanya wo kwirwanaho, bahungira muri Congo.”
RED Taraba ivuga ko yagabye iki gitero igamije kubuza aba basirikare n’abapolisi gusahura imitungo y’abaturage bagenzi babo.
Andi makuru yemejwe dukesha SOS Media avuga ko umusirikare umwe ari we wapfiriye muri iyi mirwano, mu gihe batatu n’umupolisi umwe bo bahakomerekeye.
Ariko SOS irongera ikavuga ko abasirikare, abapolisi n’abaganga bayitangarije ko iki gitero cyapfiriyemo abasirikare bane n’abapolisi batandatu, abasirikare batanu n’abapolisi babarirwa mu 10 barakomereka.
Ntacyo Leta y’u Burundi iratangaza kuri iki gitero.
