Goma: Bane bapfiriye mu myigaragambyo yamagana Polisi y’u Rwanda, 17 barakomereka

Polisi ya Repubulika ya Demukarasi ya Congo (RDC) yatangaje ko abantu bane bapfiriye mu myigaragambyo yabereye mu mujyi wa Goma kuri uyu wa 20 Ukuboza 2021, yamaganaga Polisi y’u Rwanda.

Mu bapfuye harimo umupolisi umwe, umumotari, uruhinja hamwe n’undi muntu mukuru.

Umuvugizi w’uru rwego kandi yatangaje ko iyi myigaragambyo yakomerekeyemo abantu 17 barimo abapolisi batanu n’abasivili 12, abantu 11 barafatwa.

Intwaro eshatu za Polisi ya RDC izwi nka PNC zaburiye muri iyi myigaragambyo, zikaba zafashwe n’abasivili badafite uburere nk’uko uyu Muvugizi yakomeje abitangaza.

Iyi myigaragambyo yabaye bitewe n’amakuru avuga ko hari abapolisi b’u Rwanda bari muri RDC. Gusa Guverinoma z’ibihugu byombi zirayahakana.

Aya makuru yakurikiye isinywa ry’amasezerano y’ubufatanye mu by’umutekano hagati ya Polisi y’u Rwanda n’iya RDC. Aya yashyizweho umukono n’abayobozi bakuru b’izi nzego, IGP Dan Munyuza na Gen. Dieudonné Amuli Bahigwa tariki ya 14 Ukuboza 2021, i Kigali.