Perezida wa Afurika y’Epfo, Cyril Ramaphosa uherutse gusimburwa by’agateganyo ku nshingano y’Umukuru w’Igihugu, yayisubiranye kuri uyu wa 20 Ukuboza 2021.
Tariki ya 12 Ukuboza ni bwo Perezida Ramaphosa yasimbuwe na Visi Perezida, David Mabuza bitewe n’uko uyu Mukuru w’Igihugu yari yagiye mu kato kuko yari yanduye icyorezo cya Covid-19.
Ibiro bya Perezida wa Afurika y’Epfo byatangaje biti: “Perezida Cyril Ramaphosa yarangike icyumweru cy’akato cyakurikiye ibyavuye mu bipimo tariki ya 12 Ukuboza 2021 byagaragaje ko yanduye Covid-19. Perezida yagarutse ku kazi ke, kandi azayobora inama y’abaminisitiri ya nyuma [y’umwaka] ku wa Gatatu tariki ya 22.”
Ibi biro biremeza ko Umukuru w’Igihugu yasubiye mu kazi nyuma y’aho ibipimo yafashwe byagaragaje ko yakize iki cyorezo.
Perezida Ramaphosa wanduye yarikingije Covid-19 mu buryo bwuzuye, yavuye mu kato asaba abatuye mu gihugu cye kwikingiza, bakanakurikiza amabwiriza yose yo kwirinda iki cyorezo.
