Umuvugizi w’agace k’ibikorwa bya gisirikare ka Sokola 2 mu Ntara ya Kivu y’Amajyaruguru muri Repubulika ya Demukarasi ya Congo (RDC), Lt Col. Guillaume Njike Kaiko yatangaje ko abarwanyi b’umutwe witwaje intwaro wa M23 baraye bagabye igitero ku bindi birindiro byabo bya Bukima biherereye muri Teritwari ya Rutshuru.
Yabitangarije mu kiganiro yagiranye n’itangazamakuru, i Goma kuri uyu wa 23 Ukuboza 2021 ati: “Guhera mu ijoro ry’ejo kugeza uyu munsi, ibirindiro byacu biri muri Bukima, muri Zone ya Rumangabo na Rugari byagabweho igitero na M23.”
Col. Njike yavuze ko ariko ingabo za RDC zizwi nka FARDC, zahanganye n’aba barwanyi, zibasubiza inyuma, bahungira muri Pariki, naho zikaba zahabakurikiranye kugira ngo zibirukanemo.
Iki gitero gikurikiye ikindi M23 yavuzweho kugaba ku birindiro bya FARDC bya Runyoni na none muri Teritwari ya Rutshuru tariki ya 21 Ukuboza 2021. Icyo gihe ngo abarwanyi b’uyu mutwe basize babitwitse.
M23 yari yarasenyutse mu 2013 ubwo abarwanyi bayo barambikaga intwaro, bagahungira mu bihugu bituranye na RDC, yongeye gushinjwa kugaba ibitero ku birindiro bya FARDC guhera mu ijoro rya tariki ya 7 Ugushyingo 2021 ku misozi ya Chanzu na Runyoni muri Rutshuru.
