Goma: Perezida wa Uruguay yaje gusangira Noheli n’ingabo z’igihugu cye

Perezida wa Repubulika ya Uruguay, Luis Alberto Lacalle Pou amaze kugera mu mujyi wa Goma ubarizwa mu Ntara ya Kivu y’Amajyaruguru muri Repubulika ya Demukarasi ya Congo (RDC).

Amafoto agaragaza Perezida Alberto ku kibuga cy’indege mpuzamahanga cya Goma amaze gusohoka mu ndege y’Umuryango w’Abibumbye, asuhuza abasirikare n’abapolisi ba RDC.

Perezida Alberto kandi yakiriwe mu biro n’intumwa yihariye y’Umunyamabanga Mukuru wa UN muri RDC, Bintou Keita, bagirana ikiganiro.

Radio Okapi ivuga ko uyu Mukuru w’Igihugu yaje gusura ingabo z’igihugu cye ziri mu butumwa bw’amahoro bwa UN muri RDC, MONUSCO, bakaba barasangira umunsi mukuru wa Noheli kuri uyu wa 25 Ukuboza 2021.