Umwaka w’2021 urangiye ubutunzi bw’abaherwe 10 ba mbere ku Isi bwiyongereyeho amadolari ya Amerika miliyari 402, kandi bose bakaba bafite ari hejuru ya miliyari 100; bitandukanye n’uko byari bisanzwe.
Imibare iri muri raporo ya Bloomberg Billionaires Index yo ku wa 29 Ukuboza 2021 yerekana ko ubutunzi bw’aba baherwe, by’umwihariko abafite ibigo by’ikoranabuhanga nka Elon Musk, bwatumbagiye cyane, buzamukaho miliyari zirenga 100.
Uko urutonde ruhagaze:
Elon Musk
Uyu Munyamerika ufite ikigo cya Tesla n’urubuga rw’itumanaho rwa Signal, ni we uri ku mwanya wa mbere mu batunze cyane, akaba afite umutungo ubarirwa muri miliyari 277 z’amadolari ya Amerika.
Iyi raporo ivuga ko umwaka w’2020 warangiye Musk afite umutungo ubarirwa muri miliyari 156, uwa 2021 urangira wiyongereyeho miliyari 121.
Jeff Bezos
Bezos (Umunyamerika) ufite urubuga rwa Amazon ari ku mwanya wa kabiri mu batunze cyane, akaba afite umutungo ubarirwa muri miliyari 195, zirimo 190 umwaka w’2020 warangiye afite n’5 ziyongereyeho kugeza mu mpera z’2021.
Bernard Arnault
Uyu Mufaransa uyoboye ikigo cya LVMH Moët Hennessy Louis Vuitton ari ku mwanya wa gatatu w’abatunze cyane, akaba afite umutungo ubarirwa muri miliyari 176 zirimo 61 ziyongereyeho mu mwaka w’2021. Ni we muherwe wa mbere ku mugabane w’Uburayi.
Bill Gates
Uyu Munyamerika washinze ikigo Microsoft ari ku mwanya wa kane w’abatunze cyane, akaba afite umutungo w’abarirwa muri miliyari 139 zirimo 7 ziyongereyeho mu mwaka w’2021.
Larry Page
Larry ni umwe mu bashinze ikigo cya Google, ubu akaba ari ku mwanya wa gatanu w’abatunze cyane. Umutongo we ubarirwa muri miliyari 130 zirimo 47 ziyongereyeho 47 mu mwaka w’2021.
Mark Zuckerberg
Uyu Munyamerika washinze ikigo cya Meta gihuriyeho imbuga za WhatsApp, Facebook na Instagram ari ku mwanya wa gatandatu w’abatunze cyane. Umutungo we ubarirwa muri miliyari 138 zirimo 24 ziyongereyeho mu mwaka w’2021.
Sergey Brin
Uyu Munyamerika uri mu batangije ikigo Google ari ku mwanya wa karindwi w’abatunze cyane. Umutungo we urabarirwa muri miliyari 125 zirimo 45 ziyongereyeho mu mwaka w’2021.
Steve Ballmer
Ballmer wigeze kuyobora Microsoft, akanaba nyir’ikipe ya Basketball ya Los Angeles Clippers ari ku mwanya wa munani w’abatunze cyane. Umutungo we urabarirwa muri miliyari 122 zirimo 41 ziyongereyeho mu mwaka w’2021.
Larry Ellison
Ellison nyir’ikigo cya Oracle ari ku mwanya wa cyenda w’abatunze cyane. Afite umutungo ubarirwa muri miliyari 109 zirimo 29 yungutse mu mwaka w’2021.
Warren Buffett
Uyu Munyamerika w’ikigo Berkshire Hathaway ari ku mwanya wa cumi w’abatunze cyane. Afite umutungo ubarirwa muri miliyari 109 zirimo 21 ziyongereyeho mu mwaka w’2021.
Ivoomo: CNBC, 30.12.2021
