Mu itangazo mbonekarimwe ryashyizwe ahagaragara mu gihe umwuka mubi hagati y’uburasirazuba n’uburengerazuba ugenda wiyongera, ibihugu by’Amerika, u Bushinwa, u Burusiya, u Bwongereza n’u Bufaransa byongeye gushimangira intego yabyo yo kurema Isi itarangwamo intwaro za kirimbuzi no kwirinda intambara ya kirimbuzi.
Iri tangazo ryashyizwe ahagaragara n’urubuga rwa Perezidansi y’u Burusiya, Kremlin, Minisiteri y’ububanyi n’amahanga y’u Bushinwa, ibiro bya Minisitiri w’Intebe w’u Bwongereza, Boris Johnson, Perezidansi ya Amerika, White House, na Perezidansi y’u Bufaransa.
Muri iryo tangazo, abashyizeho umukono bemeje ko ntawe ushobora gutsinda intambara ya kirimbuzi kandi ko idakwiye no kubaho na rimwe nk’uko iyi nkuru dukesha RFI ivuga.
Ibi bihugu uko ari bitanu binatunze intwaro nyinshi za kirimbuzi, bivuga ko intwaro za kirimbuzi zigomba gukora mu rwego rwo kwirwanaho, gukumira ubushotoranyi no gukumira intambara, kuko gukoresha ingufu za kirimbuzi byagira ingaruka zikomeye.
Byashimangiye akamaro ko kudakwirakwiza, kwambura izo ntwaro, ndetse n’amasezerano yo kugenzura intwaro ndetse n’imihigo. Bavuze ko bazakomeza kwiyemeza kubahiriza amasezerano yabo yo kudakwirakwiza ingufu za kirimbuzi (NPT).
Abashyizeho umukono bose uko ari batanu ni abanyamuryango bahoraho mu Kanama gashinzwe Umutekano ka Loni. Bahawe imyanya ikoreshwa nka veto nk’abatsinze Intambara ya II y’Isi.
Ibisasu bya kirimbuzi bya Amerika byarangije amakimbirane yo mu 1945 ubwo byaraswaga i Hiroshima na Nagasaki mu Buyapani; URSS bwagerageje ibisasu bya kirimbuzi byayo bya mbere mu 1949, u Bwongereza mu 1952, u Bufaransa mu 1960 n’u Bushinwa mu 1964.
Ibyatangajwe byagombaga guhurirana no gufungura inama y’Umuryango w’Abibumbye ku kugabanya intwaro, ariko inama yasubitswe kubera ubwiyongere bwa COVID-19.
