Havumbuwe ubundi bwoko bushya bwa Covid-19 bwihinduranya cyane

Abashakashatsi bo mu Bufaransa baravuga ko bavumbuye ubwoko bushya bwa Covid-19 bwihinduranya kenshi, mu gihe Isi ikiriko igihanganye n’ubwoko bwa Omicron bwandura ku muvuduko ukabije.

Aba bashakashatsi bo mu Mujyi wa Marseille bavuze ko ubwo bwoko bwiswe “‘IHU’, the B.1.640.2” bwagaragaye ku barwayi 12 baba hafi y’iyi ntara mu kwezi kwa cumi na kabiri. Uwa mbere yapimwe ko yabwanduye nyuma y’urugendo yakoreye muri Cameroun.

Aba kandi bemeje ko basanze ubwo bwoko bwihinduranya inshuro 46, ku buryo batekereza ko nta rukingo ruzabuturisha kandi bwandura cyane kurusha ubwoko bwa mbere nk’uko iyi nkuru dukesha VOA ivuga.

Ibi biravugwa mu gihe ubwoko bushya bwa Covid-19 bwaherukaga kugaragara bwiswe Omicron nabwo bukomeje kwandura ku bwinshi hirya no hino ku Isi nubwo bivugwa ko butica cyane.

Muri Amerika, omicron yagize ibice 95.4 kw’ijana by’abanduye mu gihugu cyose kuwa Gatandatu ushize, nkuko byatangajwe n’ikigo kigenzura ibijyanye n’inkingo, CDC.