Abasirikare bo mu mutwe w’Ingabo zidasanzwe za Tanzania (Special Forces) baherutse kwerekana imbunda idasanzwe yomu maboko yo kugabisha ibitero yakorewe muri Israel ifite iminwa ibiri ndetse ijyamo magazine ebyiri icya rimwe.
Iyi mbunda yo mu bwoko bwa Gilboa DBR Snake yerekanwe n’abakomando ba TPDF mu karasisi ko kwizihiza isabukuru y’Impinduramatwara ya Zanzibar yo mu 1964.
Amashusho ya tereviziyo yo muri Zanzibar yerekanye byibuze abasirikare mirongo itanu bitwaje izi mbunda zidasanzwe. Imbunda za Gilboa DBR Snake zifite iminwa ibiri zikorwa na sosiyete yo muri Israel yitwa Silver Shadow.
Gilboa DBR Snake ni imbunda yo mu bwoko bwa AR-15 y’iminwa ibiri ya 5.56 mm ijyamo na magazine ebyiri icyarimwe. Ikoresha ibice bya AR ikarasa amasasu ya 5.56 mm asohokera mu minwa ibiri itandukanye icyarimwe.
Iyi mbunda nk’uko tubikesha africanmilitaryblog, ipima kg 5.15 itarimo magazine.
Verisiyo ya gisirikari bivugwa ko iyo minwa yombi isohokamo amasasu uyikoresha akuruye imbarutso rimwe , mu gihe ubundi bwoko bwa gisivili bugurishwa muri Leta Zunze Ubumwe za Amerika buba bufite imbarutso ebyiri. Imbarutso zombi nizo ngo zituma DBR Snake yemewe ku basivili muri Amerika.
Abakiriya benshi mu bisirikare ngo biragoye cyane ko bakoresha iyi ntwaro idasanzwe mu kazi.
Impamvu nuko amasasu yongera uburemere, kandi imbunda y’iminwa ibiri irasa amasasu yikubye inshuro ebyiri bityo bikongera ikiguzi.
Igisirikare cya Tanzania (TPDF) ariko ngo gikoresha intwaro nyinshi zikorerwa muri Israel, zirimo IWI Galil ACE na Tavor TAR-21 a.
