Umunyamabanga mukuru w’ishyaka CNDD-FDD, Réverien Ndikuriyo, aravugwaho kuba kuwa Kane yarongeye guhamagarira abantu ubugizi bwa nabi mu ijambo yavugiye mu masengesho yateguwe n’iri shyaka ku ngoro yaryo, aho bamwe bavuga ko ibintu bikunze gutangazwa n’uyu mugabo biteye isoni ndetse yivanga mu kazi k’inzego z’ubutabera n’umutekano.
Muri aya masengesho Ndikuriyo mu magambo y’Ikirundi yagize ati:« … Mugabo uvyonze kabisa bakore! Si bibi ni ugukingira igihugu , igihugu kirakingirwa! (…) Uje guhungubanya inzego z-umutekano none barakunyarutsa!»
Muri Nyakanga 2019, umuturage bitaga Kaburimbo yishwe bunyamaswa n’igipolisi ngo ku mabwiriza ya Ndikuriyo ubwo yari ayoboye inteko ishinga amategeko.
Uyu icyo gihe yari yavuze ko uzafata uyu muturage cyangwa akazana umutwe we azahabwa miliyoni 5 z’Amarundi y’ishimwe nk’uko iyi nkuru dukesha UBMNews ivuga.
Muri 2015, uyu ngo yahamagariye abashinzwe umutekano n’urubyiruko rw’ishyaka CNDD-FDD (Imbonerakure) ubwo yari muri Zone ya Musaga, mu majyepfo ya Bujumbura, guhaguruka bakarwanya abari barimo kwamagana manda ya 3 ya Perezida Nkurunziza.
Abarundi batari bacye bakaba bakomeje kunenga ibitangazwa n’uyu muyobozi wa CNDD-FDD bavuga ko biteye isoni aho basanga ubutabera bwonyine ari bwo bufite ububasha bwo guhana uwo ari we wese wahamwa n’icyaha aho kwicwa ataburanye.
