Umunyamabanga wa Leta ya Kenya ushinzwe ubuzima, Mutahi Kagwe amaze gukuraho itegeko risaba abaturage kwambara agapfukamunwa mu bantu benshi, byakorwaga mu rwego rwo kwirinda ikwirakwira ry’icyorezo cya Covid-19.
Kagwe mu itangazo amaze gushyira hanze, yagize ati: “Hamaze igihe impaka ku kwambara agapfukamunwa nk’imwe mu mabwiriza yo gukumira Covid-19. Guhera ubu kwambara agapfukamunwa mu bantu benshi bivuyeho.”
Uyu muyobozi kandi yanatangaje ko abantu bikingije iki cyorezo, guhera ubu bemerewe guteranira mu nsengero mu buryo bwuzuye.
Guhera ubu kandi gupimwa ubushyuye no gushyirwa mu kato ntabwo bizongera kuba muri Kenya. Icyakoze uyu muyobozi yasabye abaturage gukomeza kubahiriza ibwiriza ryo gukaraba intoki n’isabune n’amazi meza, cyangwa gukoresha umuti wica udukoko mu gusukura intoki uzwi nka ‘Hand Sanitizer’.
Kenya ikuyeho iri tegeko mu gihe ubwandu bwa Covid-19 bukomeje kugabanyuka, haba imbere mu gihugu ndetse no mu karere iherereyemo.
