Ambasaderi w’u Burusiya muri Israel, Anatoly Viktorov, yayiburiye ko niha u Ukraine imfashanyo, igihugu cye nacyo kitazazuyaza gusubiza.
Ambasaderi Viktorov yabitangarije mu kiganiro yagiranye na televiziyo y’u Burusiya, asubiza Minisitiri w’ingabo wa Israel, Benny Gantz wemeje ko bateganya guha Ukraine imfashanyo y’ingofero n’amakote by’ubwirinzi.
Ibiro bya Minisitiri Gantz byasohoye iri tangazo nyuma yo kugirana ikiganiro na mugenzi we wa Ukraine, Oleksii Reznikov nk’uko ikinyamakuru Times of Israel kibivuga.
Iri tangazo rigira riti: “Gantz yemeje ko hagurwa ibikoresho by’ubwirinzi bizohererezwa ingabo za Ukraine ziri mu bikorwa by’ubutabazi n’imiryango ya gisivili.”
Ambasaderi w’u Burusiya amaze kubona iri tangazo, yagize ati: “Turi gusuzuma aya makuru, kandi tuzasubiza mu gihe yaba yemejwe.”
Israel izaba yiyongereye ku rutonde rw’ibihugu bikomeje guha Ukraine imfashanyo zitandukanye, kuva yatangira kugabwaho ibitero n’ingabo z’u Burusiya muri Gashyantare 2022.
