Umuryango mpuzamahanga wita ku mpunzi, UNHCR, uvuga ko muri Sudani hari ingabo za Ethiopia 528 zisaba ubuhungiro kuko zidashaka gusubira mu gihugu cyazo.
Ethiopia yari ifite ingabo zikabakaba 4000 zahoze mu butumwa bw’amahoro bw’Umuryango w’Abibumbye mu gace ka Abyei kari mu makimbirane hagati ya Sudani na Sudani y’Epfo.
Ariko bitewe n’amakimbirane Ethiopia yagiranye na Sudani ashingiye ku iyubakwa ry’urugomero runini ruri ku ruzi rwa Nile ruzwi nka Grand Reconnaissance, byatumye izi ngabo ziva muri ubu butumwa.
Gusa Umuvugizi wa UNHCR, Babar Baloch, mu kiganiro yagiranye n’ibiro ntaramakuru by’Abafaransa, AFP, yasobanuye ko izi ngabo 528 zose zikomoka muri Tigray zanze gutaha, ahubwo zisaba ubuhungiro.
Yagize ati: “Hari abarinzi b’amahoro bahisemo kudataha, bari gusaba ubuhungiro. Barinzwe na UN ahantu hatekanye. Inshingano yo gutanga ubuhungiro iri mu maboko y’ubutegetsi bwa Sudani bubifashwamo na UNHCR mu kwakira aba bantu.”
Major Gebre Kidane uri muri aba basirikare, yasobanuye ko impamvu banze gutaha ari uko bafite impungenge ku mutekano wabo nk’abakomoka muri Tigray kandi ngo barashaka kubera abavugizi bene wabo.
Yagize ati: “Nta mutekano uri mu gusubira muri Ethiopia, kandi turashaka kuba ijwi ry’abo muri Tigray. Abasirikare bakomoka muri Tigray basubiye muri Ethiopia, bamwe muri bo barafunzwe, abandi baricwa. Abanya-Tigray bari mu mwijima kandi umuryango mpuzamahanga uricecekeye. Turashaka ko ubyitaho.”
Kwanga gutaha kw’aba basirikare kwatewe ahanini n’imirwano y’ingabo za Leta n’iza Tigray yatangiye mu mpera z’2020. Zivuga ko abo muri iyi ntara bakomeje gukorerwa ihohoterwa.
