Uwahoze ari umupolisi wa Minneapolis wishe Umwirabura George Floyd yajuririye igihano yahawe kubera icyaha cy’ubwicanyi, avuga ko inteko y’abacamanza yatewe ubwoba n’imyigaragambyo yari ikomeje kandi ikabangamirwa n’ukuntu uru rubanza rwamamajwe cyane n’ibindi.
Abunganira uyu mupolisi w’umuzungu, Derek Chauvin, basabye urukiko rw’ubujurire rwa Minnesota mu busabe batanze mu ntangiriro z’iki cyumweru, guhindura icyemezo cy’urukiko no gutegeka ko urubanza rusubirwamo kandi rukabera ahandi hantu cyangwa rugategeka ko akatirwa ikindi gihano nk’uko iyi nkuru dukesha Al Jazeera ivuga.
Umwaka ushize, inteko y’abacamanza ya Minneapolis yasanze Chauvin ahamwa n’icyaha cy’ubwicanyi mu iyicwa rya Floyd, Umwirabura wishwe adafite intwaro, urupfu rwe mu 2020 rukaba rwarateje imyigaragambyo mu gihugu hose isaba irangizwa ry’ubugizi bwa nabi bw’abapolisi n’ivanguramoko ryibasira Abirabura.
Nyuma umucamanza yakatiye uwahoze ari umupolisi igifungo cy’imyaka 22.5.
Chauvin yafashwe amashusho yatsikamiye Floyd ku gakanu akoresheje ivi mu gihe cy’iminota irenga icyenda ubwo yaufataga i Minneapolis ku ya 25 Gicurasi 2020, uyu mugabo w’imyaka 46 akaba yaramwinginze inshuro nyinshi avuga ko atabasha guhumeka undi aramwirengagiza kugeza apfuye.
Muri iki cyumweru, uwunganira Chauvin, William Mohrman, yagaragaje imbogamizi nyinshi ku gihano yahawe, harimo n’uko yari amaze igihe kinini avuga ko urubanza rutagomba kubera mu gace ka Hennepin, aho Floyd yiciwe.
