Minisiteri y’ubutabera mu Burundi yatangaje ko imfungwa 574 mu gihugu cyose zahawe imbabazi, 226 zari zifungiwe muri gereza nkuru ya Mpimba zikaba zamaze gufungurwa.
Nk’uko byemejwe na Nisasagare Gaudence wungirije Minisitiri w’Ubutabera mu Burundi kuri uyu wa 29 Mata 2022, izi mfungwa zababariwe nyuma y’isuzuma ryakozwe ku myitwarire yaziranze.
Muri 862 zasuzumiwe dosiye, 288 muri zo zirakomeza gufungwa. Izo mu yandi magereza zababariwe ariko zitarafungurwa na zo zijejwe ko zirafungurwa bidatinze.
Mu kiganiro yagiranye n’imfungwa zari muri gereza ya Mpimba nyuma yo gufungurwa nk’uko ikinyamakuru Agaseke cyabitangaje, Nisasagare yazisabye ko zifatanya n’abandi benegihugu mu kugiteza imbere, ariko aziburira ko izitazitwara neza zizongera gufungwa.
Imfungwa zirebwa n’izi mbabazi ni izarangije ¼ cy’igihano zakatiwe zagaragaje imyitwarire myiza mu magereza.
