Abategetsi ba Espagne bavuze ko telefoni zigendanwa za Minisitiri w’intebe, Pedro Sanchez, na Minisitiri w’ingabo, Margarita Robles zumvirijwe hakoreshejwe software ya Pegasus mu rwego rwo “kwiteza imbere no hanze”.
Minisitiri muri perezidansi, Felix Bolanos, yemeje aya makuru kuri uyu wa Mbere agira ati: “Ntabwo ari igitekerezo, ni ibintu bifatika cyane.”
Ati: “Twese tuzi neza ko cyari igitero kivuye hanze… kubera ko muri Espagne, muri demokarasi nk’iyacu, ibikorwa nk’ibi bikorwa n’inzego zemewe kandi babiherewe uburenganzira n’ubucamanza”.
Ati: “Muri iki kibazo, nta na kimwe muri ibyo cyubahirijwe, niyo mpamvu tutashidikanya ko byaturutse hanze. Turashaka ko minisiteri y’ubutabera ikora iperereza. ”
Ntiyavuze niba abategetsi ba Espagne bazi aho igitero cyaturutse cyangwa niba hari ikindi gihugu kibyihishe inyuma.
Bolanos yavuze ko telefone ya Sanchez yatangiye kumvirizwa muri Gicurasi 2021 naho iya Robles muri Kamena muri uwo mwaka.
Yongeyeho ati: “Umubare munini w’amakuru” yakuwe muri terefone zombi. Ati: “Nta kimenyetso cyerekana ko hari ukundi kumviriza kwabaye nyuma y’ayo matariki.”
Iyi software ya Pegasus yakozwe n’ikigo cyo muri Israel yinjizwa bucece muri terefone igendanwa kugirango ikuremo amakuru cyangwa ikoreshe camera cyangwa mikoro byayo mu kuneka nyirayo.
