Komite ya Sena ishinzwe imibereho myiza n’uburenganzira bwa muntu iri kuzenguruka igihugu isuzuma uko serivisi zitangwa mu rwego rw’ubuzima.
By’umwihariko, intego yabo ni ukumenya uko serivisi zitangwa mu bitaro, n’intambwe imaze guterwa mu kuvura indwara zitandura (NCD) mu gihugu.
Urugendo rw’iminsi 15 rwatangiriye ku wa Mbere, mu Mujyi wa Kigali, ruteganijwe kugera mu ntara zose z’igihugu.
Tumwe mu turere tugiye gusurwa harimo Musanze, Burera na Rulindo mu Ntara y’Amajyaruguru, Nyuguru, Huye, Muhanga na Kamonyi mu Ntara y’Amajyepfo.
Mu Ntara y’Iburasirazuba harimo Nyagatare, Ngoma, Rwamagana na Bugesera mu gihe mu Ntara y’Iburengerazuba, ari Nyamasheke, Karongi, Ngororero na Rusizi bazasurwa.
Muri rusange, abasenateri bavuga ko bazasura ibigo nderabuzima 50, ibitaro by’uturere 15, ibitaro bibiri by’ikitegererezo n’ibitaro bine byigenga.
Senateri Adrie Umuhire, Perezida wa Komisiyo ya Sena ishinzwe imibereho myiza n’uburenganzira bwa muntu yatangarije ikinyamakuru The New Times ko iryo suzuma rituruka kuri raporo zimwe na zimwe inteko ishinga amategeko, umutwe wa Sena, yakiriye.
Ati: “Umwaka ushize, twakiriye raporo n’Urwego rw’igihugu rushinzwe imiyoborere (RGB) yerekana ko abantu batishimiye imitangire ya serivisi mu bigo nderabuzima byabo, bityo turi gushaka ikibura nk’abajyanama ba guverinoma, tunatanga ibisubizo.”
Raporo ya RGB yo mu 2021 yerekanye ko 22 ku ijana by’Abanyarwanda batanyuzwe na serivisi bahabwa mu kwivuza.
Mu babajijwe 35 ku ijana bamagana serivisi zita ku bakiriya mu bigo nderabuzima mu gihe 36.3 ku ijana batishimiye serivisi z’ubuvuzi.
Serivise zo kuvura indwara zitandura (NCD) mu bigo nderabuzima
Senateri Umuhire yagaragaje kandi ko komite ye izasura ibigo nderabuzima 50 bagenzura niba byiteguye guhangana n’indwara zitandura.
Umuhire yibukije ko Inteko ishinga amategeko umutwe wa Sena yazengurutse igihugu mu mwaka wa 2016 maze imenya ko mu bitaro by’uturere hari serivisi zita ku barwayi barwaye indwara zitandura, ariko nta bigo nderabuzima.
Ati: “Kandi iki ni ikibazo gikomeye, kubera ko abaturage bose badashobora kuva mu midugudu yabo ya kure bajya mu bitaro by’akarere. Bishobora kwongera ikbazo cy’ubuzima bwabo ”.
Mu bigo nderabuzima, komite ireba umubare w’abakozi, ubushobozi bwabo ndetse n’ibikoresho byo kwa muganga byo kuvura indwara zitandura.
Nyuma y’uruzinduko, komite izagirana ibiganiro n’abayobozi ba Minisiteri y’Ubuzima, Ikigo cy’Ubwiteganyirize cy’u Rwanda n’abandi bafatanyabikorwa mu rwego rw’ubuzima.
