Umusirikare w’u Burusiya w’imyaka 21 waburanishijwe mu rubanza rwa mbere rw’ibyaha by’intambara kuva u Burusiya bwatera muri Ukraine yemeye icyaha cyo kwica umusivili udafite imbunda.
Sgt. Vadim Shishimarin ashobora gufungwa burundu azira kurasa mu mutwe umugabo w’umunya-Ukraine w’imyaka 62 mu majyaruguru y’akarere ka Sumy mu minsi ya mbere y’igitero.
Shishimarin, umusirkare w’u Burusiya wo mu mutwe utwra ibimodoka by’intambara, yaburanishijwe hakurikijwe amategeko ahana ya Ukraine nk’uko tubikesha Al Jazeera.
Umushinjacyaha mukuru wa Ukraine, Iryna Venediktova, yari yabanje kuvuga ko ibiro bye byitegura kuburanisha imanza 41 zirebana n’abasirikare b’Uburusiya kubera ibyaha birimo gutera ibisasu ku bikorwa remezo bya gisivili, kwica abaturage, gufata ku ngufu no gusahura.
Ntabwo byahise bisobanuka umubare w’abakekwaho icyaha bari mu maboko ya Ukraine ndetse n’umubare w’abazaburanishwa badahari.
Nk’urubanza rwa mbere rw’ibyaha by’intambara muri Ukraine, ishinjwa rya Shishimarin ryakurikiraniwe hafi. Abashakashatsi barimo gukusanya ibimenyetso by’ibyaha by’intambara bishobora gushyikirizwa urukiko mpuzamahanga mpanabyaha i La Haye.
