Imodoka ya Mercedes-Benz yo mu 1955, 300 SLR Uhlenhaut, yabaye imodoka ya mbere ihenze ku Isi nyuma yo kugurwa mu cyamunara n’umuntu ukusanya ibintu bya kera, indi modoka nk’iyi ikaba izaguma mu nzu ndangamurage w’imodoka ya Mercedes.
Mercede-Benz yatangaje ko yagurishije iyi modoka ku muntu wigenga ku kayabo ka miliyoni 143 z’Amadolari ( Hafi miliyari 150 z’Amanyarwanda) muri cyamunara, biyigira imodoka ya mbere ihenze ku Isi.
Iyi modoka ifite imiryango imeze nk’amababa yitiriwe injeniyeri Rudolf Uhlenthaunt. Cyamunara yabereye ku nzu ndangamurage w’imodoka ya Mercedes-Benz muri Stuttgart ku itariki 5 Gicurasi nk’uko tubikesha Deutsche Welle.
Iyi nzu ndangamurage w’imodoka ya Mercedes-Benz irimo imodoka zigera mu 1100 zirimo izakozwe mu 1886. Ola Källenius, chairman w’Inama y’Ubuyobozi ya Mercedes-Benz, yavuze ko Imodoka ya Uhlenhaut ari “intambwe y’ibikorwa by’iterambere ry’imodoka za siporo n’iterambere ry’ingenzi ry’amateka.”
Amafaranga yakuwe mu kugurisha iyi modoka ngo azagira akamaro muri gahunda mpuzamahanga ya bourse yashyizweho na sosiyete. Intego ya bourse izaba iyo guteza imbere iterambere rishya ry’ikoranabuhanga ridahumanya ikirere no kubungabunga umutungo kamere.
