U Burusiya burigamba kwica abajenerali basaga 50 ba Ukraine bari mu nama

Abayobozi b’u Burusiya batangaje ko abasirikare bakuru basaga 50 ba Ukraine, barimo abajenerali n’abagize ubuyobozi bukuru bw’ingabo, biciwe mu gitero cya missile.

Igisirikare cy’u Burusiya ngo kikaba cyagabye igitero ku cyicaro cy’ubuyobozi bw’ingabo za Ukraine, aho bakoreraga inama nk’uko byemezwa na minisiteri y’ingabo y’u Burusiya.

Moscow ikaba ivuga ko bakoresheje ibisasu bya rokete byo mu bwoko bwa Kalibr byarasiwe mu nyanja mu kurasa ku cyicaro cy’ingabo za Ukraine hafi y’umujyi wa Dnipro, wa kane munini muri Ukraine nk’uko tubikesha Detsche Welle.

Umuvugizi wa Minisiteri y’Ingabo y’u Burusiya, Igor Konashenkv, yagize ati “ Abajenerali basaga 50 b’Igisirikare cya Ukraine biciwe mu gitero, barimo abagize ubuyobozi bukuru bw’ingabo.”

Uyu yongeyeho ko u Burusiya bwanasenye ahakorerwa ibifaru byapfuye muri Kharkiv ndetse n’ibibunda 10 bya rutura byo mu bwoo bwa Howitzers n’imodoka zisaga 20 za gisirikare ahitwa Mykolai, mu bitero bitandukanye by’indege.