Igitero cyagabwe n’inyeshyamba za UPC-CPC ku birindiro by’Ingabo za Centrafrica (FACAS) ku Cyumweru gishize, itariki ya 3 Nyakanga 2022 cyaguyemo byibuze abantu cumi na babiri. Imirwano ikaba ikomeje kubera ahitwa Dimbi.
Imibare y’agateganyo y’abiciwe cyangwa abakomerekeye muri iyi mirwano yabaye hagati y’inyeshyamba za UPC-CPC na FACAS ivuga ko abantu 12 bapfuye ku ruhande rw’abagabye igitero, naho abasirikare 2 ba leta bakomeretse ndetse n’umusore wo mutwe wo kwirwanaho wishwe.
Amakuru aturuka mu nzego z’umutekano avuga ko hari inyeshyamba zatawe muri yombi. Iyi nkuru dukesha Jounal de Bangui ikaba ivuga ko abarwanyi b’umutwe w’inyeshyamba bari bitwaje intwaro zihagije, bikaba byaratumye ingabo za leta zirwana zisubira inyuma.
Imirwano yongeye gutangira bushya ubwo abacanshuro b’Abarusiya bahageraga. Baje gutabara ingabo za leta bari muri kajugujugu. Kubera indege y’abacanshuro ba Wagner, inyeshyamba zirukanwe mu mujyi.
Bivugwa ko ingabo za leta zongeye kugenzura ako karere ariko hashyizweho isaha ntarengwa yo gutahiraho muri Dimbi.
