Igisirikare cya Uganda (UPDF) cyatangaje ko abofisiye bato n’abasirikare bato bazongezwa umushahara ku kigero kiri hasi ugereranyije n’abafite amapeti ari ku rwego rwa General.
Itangazo ryasohowe n’Umuvugizi wa UPDF, Brig. Gen. Felix Kulayigye risobanura ko tariki ya 6 Nyakanga 2022, abasirikare bakuru bari bateraniye ku cyicaro, bagejejweho kandi bemera umushinga wa Minisiteri y’ingabo wo kongerera umushahara abasirikare bose.
Iyi Minisiteri yabamenyesheje ko umushahara ugomba kongezwa Brigadier General kugeza kuri General ku kigero cy’100% (uzikuba kabiri), guhera kuri Major kugeza kuri Colonel ukazongezwa ku kigero cya 50% (uzongerwaho icya kabiri), na ho guhera kuri Private kugeza kuri Captain ukazongezwa kuri 33%.
Byagaragaye ko iyi nyongera izazamura umushahara w’abasirikare ku mwaka, ukagera kuri mashili 517.907.737.434 n’uduhimbazamushyi tw’amashilingi 116.847.632.570. Igiteranyo cya yose ni 634.755.370.004.
Abasirikare bato bazongezwa ku kigero gito kandi nyuma y’abandi
Gen. Kulayigye asobanura ko abasirikare guhera kuri Private kugera kuri Captain bazongezwa umushahara ku kigero kiri hasi ugereranyije n’abandi kubera ko abari muri iki cyiciro ari benshi kurusha abo mu bindi nka ba Generals.
Ati: “Inama yemeje ukwiyongera kw’100% ku bofisiye ba General kubera ko bari bake, bamaze igihe kinini mu kazi kandi abenshi bari hafi gusezera mu mwaka w’2022/2023. Yemeje kandi iyongerwa rya 50% ku bofisiye bakuru kubera ko batari benshi cyane, kandi abenshi muri bo bakaba bari hafi kuzamurwa ku rwego rwa ofisiye General.”
Si ibyo gusa, ahubwo ngo aba basirikare bato bongerejwe hamwe n’abandi bakozi ba Leta mu mwaka w’2018/2019. Ati: “Ariko inama yagaragaje ikibazo ku iyongerwa ry’umushahara ku basirikare bato kubera ko ari benshi, ikindi umushahara wabo wongeje mu 2018/2019 ubwo n’abandi bakozi ba Leta bongezwaga. Icyo gihe, umushahara w’abofisiye General n’abofisiye bakuru wo ntiwongejwe.”
Igisirikare cya Uganda kibona abasirikare bato babaye bongerejwe umushahara ku kigero kinini kandi mu mwaka w’ingengo y’imari umwe na ba Generals n’abandi bofisiye bakuru, byafatwa nk’ikibazo. Kiti: “Kuvugurura umushahara w’abasirikare bato na none, hirengagijwe abandi bakozi ba Leta nk’abarimu, ntibyaba biboneye kandi byakurura impaka zitari ngombwa.”
Mu gihe ba Generals n’abandi bofisiye bakuru bazongererwa umushahara mu 2022/2023, abasirikare bato bo bazongezwa mu 2023/2024 ubwo n’abandi bakozi ba Leta bongerejwe rimwe bazaba bongejwe.
