Ishyaka rya rubanda riharanira kongera kwiyubaka na demokarasi (PPRD) ry’uwahoze ari Perezida wa Repubulika ya Demokarasi ya Congo, Joseph Kabila, ryatangaje ko igikorwa cyose cyo kugerageza kwigiza inyuma amatora ateganyijwe mu mwaka utaha rizagifata nko gushoza intambara.
Iri shyaka ribarizwa mu ihuriro FCC (Front Commun pour le Congo) rirakangisha gushyira mu bikorwa ingingo ya 64 y’itegeko nshinga mu gihe amatora rusange ateganyijwe mu 2023 yaba adateguwe.
Ibi byatangajwe kuri uyu wa Kane, itariki 14 Nyakanga 2022, n’Umunyamabanga Uhoraho wa PPRD, Emmanuel Ramazani Shadary, mu gikorwa “Jeudi Politique à Lukunga”, gitegurwa buri wa Kane n’iri shyaka ryahoze ku butegetsi.
“Twe tuzajya mu matora. Niba muri 2023 nta matora abaye, ni ugutangaza intambara. Iri tangazo ry’intambara ni ingingo ya 64. Tuzashyira mu bikorwa ingingo ya 64 y’Itegeko Nshinga kugira ngo twirukane abadafite ubushobozi n’abatarize,” uyu ni Shadary wari imbere y’imbaga y’abayoboke ba PPRD n’abakada bayo nk’uko tubikesha 7sur7.cd.
Uyu munyapolitiki bakunze guhimba « Coup sur coup » yasabye abakada n’abayoboke ba PPRD kwitegura kwitaba mu gihe bahamagarirwa gukora imyigaragambyo yo mu mahoro.
Ati “ Ni yo mpamvu ejo nitubahamagara ngo mumanuke mu mihanda, mugomba kuza. Nitugira urugendo urwo ari rwo rwose mugomba kuza,”
Hagati aho, iri shyaka rikaba rikomeje gusaba ko komisiyo y’igihugu yigenga y’amatora (CENI) yasimburwa kimwe n’abacamanza bo mu rukiko rushinzwe kurinda itegeko nshinga, mbere y’amatora ataha.
Iyo ngingo ya 64 y’itegeko nshinga PPRD yiteguye kwitabaza nihataba amatora, ivuga ko “Buri Munyekongo afite inshingano zo gutsinda umuntu uwo ari we wese cyangwa itsinda ry’abantu bafata ubutegetsi ku ngufu cyangwa babukoresha binyuranyije n’iri Tegeko Nshinga. Kugerageza guhirika ubutegetsi bugendera ku itegekonshinga ni icyaha ku gihugu na Leta. Ahanishwa amategeko.”
Iyi nkuru ikaba yibutsa ko n’ishyaka Engagement pour la Citoyenneté et le Développement (ECIDé) rya Martin Fayulu Madidi naryo ryihanangirije igikorwa cyose cyo gusunika amatora ya 2023 ubwo ryasozaga kongere yaryo yabereye mu Mujyi wa Kisangani kuwa Kane ushize.
