Ingabo za Afurika y’Epfo mu myitozo yo kurwanira mu ishyamba mbere yo koherezwa muri RDC

Batayo ya 10 y’abasirikare barwanira ku butaka ba Afurika y’Epfo ifite icyicaro i Mafikeng iri mu myitozo y’intambara yo mu mashyamba ahitwa Entabeni mbere y’uko yoherezwa muri Brigade ishinzwe gutabara ya MONUSCO (FIB) muri Repubulika ya Demokarasi ya Congo.

Izi ngabo za Afurika y’Epfo zirimo kwitegura bwa nyuma kujya gusimbura izindi zihasanzwe mu Kwakira n’Ugushyingo kandi imyitozo iyobowe kandi iragenzurwa na Brigade ya 43. Imyitozo yabereye ahitwa Ben Viljoen kandi muri kamena yari ikubiyemo ibintu nko gukora amarondo ku maguru no mu modoka, imyitozo ya ambush, kurinda ibirindiro, guherekeza, guhungisha abakomeretse n’ibindi.

Imyitozo yimukiye Entabeni muri Limpopo. Aka gace gasa n’amashyamba yo muri Repubulika ya Demokarasi ya Congo agizwe n’ibiti bitoshye ndetse birebire nk’uko tubikesha africanmilitaryblog.

Icyicaro gikuru cya Brigade ya 43 y’ingabo za Afurika y’Epfo cyatangaje kuri iki cyumweru ko ingabo z’Afurika y’Epfo “ziri mu myitozo ikomeye y’intambara yo mu mashyamba yibanda ku mayeri yihariye, tekinike n’uburyo butuma umusirikare abaho kandi akorera mu karere k’amashyamba.

Abasirikare bazigishwa uburyo bwo kwiyobora mu mashyamba, uko bayabamo, ibikorwa byo kwambuka imigezi hamwe nibikoresho by’intambara kandi byongeye bazakora imyitozo yo gukora amarondo mu mashyamba no kurasa mu mashyamba.

Amahugurwa y’intambara yo mu mashyamba azatwara ibyumweru bine mbere y’uko abasirikare bashyikirizwa ku mugaragaro ibikorwa bihuriweho n’amahugurwa yo kwitegura ubutumwa i De Brug, Bloemfontein mbere y’uko berekeza mu burasirazuba bwa Repubulika ya Demokarasi ya Congo.