Uganda: Umuhungu w’imyaka 16 birakewa ko yishwe n’urukingo rwa Covid-19

Umuhungu w’imyaka 16 wo mu gihugu cya Uganda, wahawe urukingo rwa Covid, bivugwa ko rwateje ingingo nyinshi ze kunanirwa, yapfuye.

Nk’uko abo mu muryango wa hafi babitangaza, Jonathan Luyinda yapfuye ku wa Gatandatu ashyingurwa kuri uyu wa Mbere ushize mu rugo rwa basekuruza i Nzizi, mu Karere ka Masaka.

Ku munsi w’ejo, mukuru wa Luyinda, Jasper Nsubuga, yabwiye Daily Monitor ati: “Murumuna wanjye yarapfuye, abaganga batubwiye ko umutima we wananiwe, bagerageza kumuzura ariko ikibabaje ni uko bitagize icyo bitanga.”

Luyinda wari umunyeshuri mu mwaka wa kabiri mu ishuri ryisumbuye rya St Martin mu Karere ka Mpigi, kuva muri Gashyantare yahoraga mu bitaro, ubundi agasohoka, agasubiramo, gutyo gutyo.

Yari afite uburwayi bwo kubyimba umubiri cyane ndetse no kunanirwa kw’ingingo nyinshi bivugwa ko byatewe n’urukingo.

Mu kwezi gushize, umuvugizi wa Minisiteri y’ubuzima, Emmanuel Ainebyoona, yemeje ko bari bazi ikibazo cya Luyinda kandi ko hakomeje iperereza kugira ngo hamenyekane neza niba urupfu rwe rwaratewe n’urukingo cyangwa indwara yari asanganwe.

Kuri uyu wa Mbere Ainebyoona akaba yatangarije iki kinyamakuru ko iperereza ryasojwe kandi raporo izashyirwa ahagaragara vuba.

Ati: “Iperereza ryakozwe kandi raporo irimo gukorwa, sinshobora kugira icyo mvuga kuri iki kibazo kuko ntemerewe kuganira ku bisubizo. Icyakora, raporo ikimara gusohoka, ibisubizo bizamenyekanishwa n’umuyobozi mukuru wa serivisi z’ubuzima ”.

Nyina wa nyakwigendera, Tendo Nalwadda, yavuze ko Luyinda yari mu gice cyita ndembe mu Bitaro by’Icyitegererezo bya Kiruddu mu minsi 33 ishize mbere y’uko bamenyeshwa ko umutima we wahagaze.

Yavuze ko umwana yari yuzuye ibyiringiro kandi arota kuzaba injeniyeri.