Perezida wa Leta Zunze Ubumwe za Amerika, Joe Biden, yongeye kwipimisha COVID-19 asanga yaranduye, nyuma y’iminsi mike yemerewe kuva mu kato, nyuma yo kuvurwa hakoreshejwe imiti irwanya virusi nk’uko White House yavuze.
Umuganga wa White House, Dr Kevin O’Connor, mu ibaruwa yanditse ku wa Gatandatu, yavuze ko Biden “atigeze agaragaza ibimenyetso, kandi ko akomeje kumererwa neza”.
Nk’uko O’Connor abitangaza, ngo Biden wasanzwemo iyi ndwara mu minsi icyenda ishize ariko nyuma agapimwa kabiri atayisangwamo mu ntangiriro z’iki cyumweru, azakomeza inzira y’akato, kandi gusangwamo iyi ndwara ngo byaba byaratewe na bamwe mu barwayi bayo yahuye nabo.
Biden yanditse kuri Twitter ku kwandura kwe, avuga ko bishobora kubaho ku “bantu bake.” Nk’uko iyi nkuru dukesha Al Jazeera ivuga.
Ati: “Nta bimenyetso nabonye ariko ngiye mu kato kubera umutekano w’abantu bose turi kumwe. Ndacyari ku kazi, kandi nzagaruka vuba aha “.
Biden w’imyaka 79, yasanzwemo Covid-19 bwa mbere ku ya 21 Nyakanga hanyuma avurwa n’umuti urwanya iyi virusi witwa Paxlovid. Yipimishije virusi na none kuwa 26 na 27 Nyakanga asanga ari muzima yemererwa kuva mu kato ariko akomeza kwambara agapfukamunwa mu gihe ari ahantu hafunganye.
