Gasabo: Abagabo 3 bashinjwa kwica umugore w’umwe muri bo bafunzwe iminsi 30 y’agateganyo

Urukiko rw’ibanze rwa Kicukiro muri iki cyumweru rwasomye icyemezo ku ifungwa ry’agateganyo dosiye iregwamo abagabo batatu Ubushinjacyaha bukurikiranyeho icyaha cy’ubwicanyi buturutse ku bushake. Urukiko rwemeje ko abaregwa bakurikiranwa bafunzwe by’agateganyo mu gihe cy’iminsi mirongo itatu.

Ku itariki ya 07/07/2022 nibwo abaregwa bacuze umugambi wo kwica UMUHIRE Francine, umugore w’umwe muri abo bagabo, bakaba barabanaga mu buryo butemewe n’amategeko.

Ubushinjacyaha Bukuru dukesha iyi nkuru buvuga ko aba bagabo bishe nyakwigendera bamunigiye mu modoka bamunigishije umukandara w’umukara w’abakarateka, umurambo bajya kuwujugunya mu Karere ka Kicukiro, Umurenge wa Kicukiro, Akagali ka Kagina.

Icyo cyaha cy’ubwicanyi nikiramuka kibahamye bazahanishwa igihano cy’igifungo cya burundu hashingiwe ku ngingo ya 107 y’itegeko No 68/2018 ryo ku wa 30/08/2018 riteganya ibyaha n’ibihano muri rusange.