Umuyobozi w’akarere ka gisirikare ka 34 mu ngabo za Repubulika ya Demukarasi ya Congo, FARDC, gaherereye mu ntara ya Kivu y’Amajyaruguru, Brigadier-Général Ghislain Tshinkobo, yapfiriye mu mujyi wa Goma.
Radiyo Okapi isobanura ko amakuru yamenye avuga ko Gen. Tshinkobo yishwe n’indwara y’umutima kuri uyu wa 16 Kanama 2022.
Gen. Tshinkobo amaze gupfa, umurambo we wajyanwe mu buruhukiro bw’ikigo cya gisirikare i Goma, mu gihe hategurwa umuhango wo kumusezera bwa nyuma.
Uyu musirikare yabaye umuyobozi w’akarere ka gisirikare ka 34 kuva tariki ya 10 Kamena 2021, ubwo yasimburaga mugenzi we, Brig. Gen. Dieudonné Kapinga Mwanza.
Urupfu rwe rukurikiye urwa mugenzi we na we wayoboye akarere ka gisirikare ka 34 kugeza mu 2018 (kacyitwa akarere ka 8), Gen. Vainqueur Mayala wapfiriye i Kinshasa tariki ya 4 Kanama 2022, azize uburwayi.
Gen. Mayala wapfuye afite imyaka 70 y’amavuko, yashyinguwe kuri uyu wa 15 Kanama 2022. Uyu muhango witabiriwe n’abasirikare bakomeye barimo Umugaba Mukuru wa FARDC, Gen. Célestin Mbala.
