Amafoto: Abagize guverinoma n’ibyamamare bitandukanye bizihije ubuzima bwa Buravan

Minisitiri w’urubyiruko n’umuco, Rosemary Mbabazi, Minisitiri wa siporo, Aurore Mimosa Munyangaju n’ibyamamare bitandukanye mu myidagaduro mu Rwanda, bitabiriye umuhango wo kwibuka no kwizihiza ubuzima bw’umuhanzi Burabyo Yvan wamamaye nka Yvan Buravan, uherutse kwitaba Imana.

Ibyamamare byitabiriye uyu muhango birimo abahanzi nka: Masamba Intore, Uncle Austin, Peace Jolis, Israel Mbonyi na Prosper Nkomeza bamenyekanye mu ndirimbo zo kuramya no guhimbaza Imana, Ruti Joel, Ariel Wayz, Christopher Muneza, Andy Bumuntu, Kevin Kade,…, nyampinga w’u Rwanda w’2022, Miss Nshuti Muheto Divine, abanyamakuru barimo Sandrine Isheja Butera,…

Umushumba w’itorero rya Angilikani/Paruwasi ya Remera, Pasiteri Dr Antoine Rutayisire n’abagize itsinda ryamamaye mu kuramya no guhimbaza Imana rya Kingdom of God Ministries ryashinzwe n’abarimo Yvan Buravan na bo bari bahari. Hari kandi itorero gakondo Ibihame by’Imana, ryanzuye uyu muhango mu byivugo n’indirimbo bisezera kuri uyu muhanzi wari ufite izina ry’ubutore rya ‘Nkongi’.

Muri uyu muhango wabereye mu mahema ya Camp Kigali mu karere ka Nyarugenge kuri uyu wa 23 Kanama 2022, Minisitiri Mbabazi yatanze ubuhamya kuri Buravan, abwira abawitabiriye ko yari umuntu utaracikaga intege no mu bihe bya Covid-19 byakomye mu nkokora imyidagaduro.

Yagize ati: “Ndibuka mu nama twakoranye n’abahanzi online, Yvan ni we watanze igitekerezo avuga ko tutagomba gucika intege kuko inganzo turayifite, ibihangano turabifite, reka dukoreshe ikoranabuhanga tugere ku Banyarwanda benshi. Yari umwana w’igihugu, yari umwana w’Imana. Twize isomo ki mu buzima bwa Yvan? Yari ishema ku gihugu cyacu, yari ishema ku Isi hose.”

Benshi batanze ubuhamya muri uyu muhango, guhera ku bo mu muryango we, abahanzi nka Uncle Austin wafashije Buravan kuzamura impano ye, Masamba Intore watoje uyu muhanzi kuririmba indirimbo za gakondo, umuyobozi wa Kingdom of God Ministries wari inshuti ye; bose bahuriza ku kuba yari umuntu wahoranaga icyizere, no mu gihe cy’uburwayi bwe.

Yvan Buravan yapfiriye mu bitaro byo mu Buhinde tariki ya 17 Kanama 2022, azize kanseri y’urwagashya. Arashyingurwa kuri uyu wa 24 Kanama.