Umunyapolitiki Raila Odinga wahatananiye umwanya w’Umukuru w’Igihugu mu matora aherutse kuba muri Kenya, arasaba urukiko rw’ikirenga kwemeza ko ari we watsinze.
Nyuma y’iminsi 6 amatora yari amaze abaye, Umuyobozi wa komisiyo yigenga iyashinzwe, Wafula Chebukati, tariki ya 15 Kanama 2022 yatangaje ko Dr William Ruto ari we watsinze, agize amajwi 50.49%, Odinga amukurikira n’amajwi 48.85%.
Odinga yanze ibyatangajwe na Chebukati byari byanaciyemo ibice bibiri abagize komisiyo y’amatora, tariki ya 22 Kanama atanga ikirego mu rukiko rw’ikirenga, asaba ko rutesha agaciro intsinzi ya Dr Ruto.
Ubwo uyu munyapolitiki yaganirizaga abayoboke b’ihuriro ry’imitwe ya politiki rya Azimio la Umoja yari ahagarariye mu matora, i Mombasa kuri uyu wa 24 Kanama, yasobanuye ko icyo yifuza ari uko urukiko rwakwemeza ko ari we watsinze amatora.
Yagize ati: “Turashaka ko urukiko ruvuga ko twebwe twatsinze, kandi uku ni ko kuri, twaratsinze kandi na nyuma yo kongera kuva mu matora, bizatangazwe ko twatsinze, hanyuma turahire.”
Raila yabisubiyemo akoresheje urubuga rwa Twitter kuri uyu wa 24 Kanama. Yagize ati: “Aba bavandimwe baratumenyera. Kuri iyi nshuro ntidushaka imikino. Intsinzi yacu ntabwo izatakara byoroshye, bizasobanukira mu rukiko. Abanyakenya bazamenya uwa nyawe watsinze amatora ya Perezida kandi ubikwiriye.”
Amatora ya Perezida wa Kenya yabaye tariki ya 9 Kanama. Abakandida bari bahatanye ni Odinga, Dr Ruto, Prof. George Wajackoyah na David Waihiga.
