Umusimbura wa Boris Johnson ku mwanya w’Umuyobozi Mukuru w’ishyaka riri ku butegetsi, Conservative Party, akaba na Minisitiri w’Intebe w’u Bwongereza, amaze kumenyekana.
Uyu ni Liz Truss usanzwe ari Umunyamabanga wa Leta ushinzwe ububanyi n’amahanga, wari uhataniye uyu mwanya na Rishi Sunak usanzwe ari umudepite mu nteko ishinga amategeko y’u Bwongereza.
Truss yatowe n’abantu 81,326 angana na 57%, Sunak atorwa n’60,399.
Amaze kwegukana intsinzi, Truss yashimiye abamugiriye icyizere. Ati: “Ntewe ishema no gutorerwa kuyobora Conservative Party. Mbashimiye kunyizera kugira ngo nyobore kandi nkorere igihugu cyacu cyiza. Nzafata ingamba zihamye kugira ngo twikure muri ibi bihe bigoye, nteze imbere ubukungu kandi nziture ububasha bw’Ubwami bw’u Bwongereza.”
Truss agiye gusimbura Boris weguye mu ntangiriro za Nyakanga 2022 ubwo abagize guverinoma bahagarariye Conservative bagera kuri 40 bari bamaze kwegura mu rwego rwo kwitandukanya na we, bamuhora ko yahaye akazi k’ubuhwituzi uwitwa Chris Pincher mu gihe yari agikurikiranwe n’ubutabera.
Boris wemeye ko yakoze ikosa ryo guha akazi ufite umuziro ntabwo yahise ava ku nshingano kuko yagombaga gutegereza mu ishyaka riri ku butegetsi bakabanza gutora umusimbura we.
