Hejuru ya kimwe cya kabiri cy’ubutunzi bwa Afurika bwihariwe n’ibihugu bitatu

Hejuru ya kimwe cya kabiri cy’ubutunzi bwa Afurika bugenzurwa n’ibihugu bitatu gusa nk’uko bigaragara muri raporo ya Africa Wealth Report y’uyu mwaka yasohowe n’ikigo ngishwanama mu by’ishoramari cyo mu Bwongereza, Henley & Partners, ku bufatanye n’ikigo cy’ubutasi mu by’ubukungu cyo muri Afurika y’Epfo, New World Wealth .

Afurika y’Epfo, Misiri, na Nijeriya byihariye miliyari 651 z’amadolari, miliyari 307 z’amadolari, na miliyari 228 z’amadolari y’umutungo bwite wose hamwe ungana na tiriyari 1.18 z’amadolari, bivuze ko ari 56% by’ubutunzi bwose bwa Afurika bungana na tiriyari 2.1 z’amadorari.

Ibihugu bya Maroc na Kenya bifunga urutonde rw’ibihugu bitanu bya mbere ku mugabane wa Afurika hamwe n’umutungo bwite ungana na miliyari 125 na miliyari 91 z’amadolari.

Dominic Volek, umuyobozi w’itsinda ry’abakiriya bigenga muri Henley & Partners muri iyi raporo yagize ati: “Urebye ku Isi hose, Afurika y’Epfo, Nijeriya, na Misiri byari mu bihugu 15 bya mbere mu bijyanye n’iperereza rya Henley & Partners ryo mu mwaka ushize. Afurika y’Epfo yari ku mwanya wa 5 ku Isi yose, aho yiyongereyeho 38% mu 2021, Nijeriya ku mwanya wa 7 hamwe na 15% naho Misiri ikaza ku mwanya wa 14 hamwe na 25%. ”

Mu rwego rwo kwerekana uburyo ibihugu bikize cyane bigira ingaruka ku mutungo rusange w’umugabane, mu myaka icumi ishize, Afurika y’Epfo, Misiri, na Nijeriya byagize umuvuduko muto w’ubwiyongere bw’umutungo bwite wo munsi ya 12%, -23%, na -27% , bitera igabanuka rya 7% ry’ubukungu bwa Afurika kuva mu 2011.

Afurika y’Epfo ituwe n’abaherwe batunze miliyoni z’amadolari bakubye inshuro zirenze ebyiri kurusha ibindi bihugu bya Afurika.