Perezida w’u Burusiya, Vladimir Putin, yategetse ko guhera mu mwaka utaha, isomo ry’ubumenyi bw’ibanze ku gisirikare rijya ryigishwa no mu mashuri asanzwe yigishwamo ubumenyi rusange.
Ni icyemezo cyatangajwe na Minisiteri y’uburezi y’u Burusiya, isobanura ko iri somo rizaba ari inyongera (extra-curricular), iti: “Isomo ry’inyongera ku mahugurwa y’ubumenyi bw’igisirikare rizategurirwa amashuri yo mu Burusiya kandi ritangire kwigishwa muri gahunda y’amasomo kuva mu mwaka w’amashuri utaha.”
Ikinyamakuru RIA Novosti cyo mu Burusiya kivuga ko gahunda ihari iteganya ko iri somo rizajya ryigwa mu myaka ibiri, abanyeshuri baryige amasaha 140, kandi ngo abarimu bazajya babigisha ni abahoze ari abasirikare bafite ubunararibonye ku rugamba.
Iki cyemezo cyishimiwe na Minisiteri y’ingabo y’u Burusiya, itangaza ko kwigisha abana isomo ry’igisirikare bizabategura ku buryo mu gihe kizaza bazaba bafite ubushobozi bwo kurwanirira igihugu cyabo, mu gihe gihanganye n’umwanzi.
