Ikipe ya APR FC yafashe by’agateganyo umwanya wa mbere ku rutonde rwa shampiyona y’u Rwanda, nyuma yo gutsinda Kiyovu Sports ibitego 3-2.
Iyi kipe y’Ingabo z’Igihugu yari yasuye Kiyovu Sports, mu mukino w’umunsi wa 17 wa shampiyona.
Ni umukino waranzwe no gusatirana ku mpande zombi.
Kiyovu Sports yawinjiyemo hakiri kare yafunguye amazamu ku munota wa Kabiri w’umukino ibifashijwemo na Iradukunda Bertrand, nyuma y’akazi gakomeye kari gakozwe n’umunya-Uganda Erissa Ssekisambu.
Byasabye umunota wa 20 w’umukino ngo APR FC yishyure iki gitego biciye kuri Bizimana Yannick, nyuma y’Umupira yari ahawe na Lague Byiringiro.
Iyi kipe y’Ingabo z’Igihugu yatsinze igitego cya kabiri ku munota wa 27 ibifashijwemo na Ramadhan Niyibizi, ku ishoti riremereye yatereye kure birangira umupira uruhukiye mu izamu rya Nzeyurwanda Djihad.
Iminota 45 y’umukino yarangiye APR FC iri imbere n’ibitego 2-1.
Byasabye umunota wa 51 w’umukino ngo Kiyovu Sports yatangiye igice cya kabiri cy’umukino yotsa igitutu APR FC itsinde igitego cya kabiri biciye kuri Nshimirimana Ismael Pitchou.
Kera kabaye APR FC yabonye igitego cy’intsinzi ku munota wa 90+3 ibifashijwemo na myugariro Niyigena ClĂ©ment. Hari ku mupira wa Coup-Franc yatewe na Kapiteni Manishimwe Djabel, birangira Niyigena ClĂ©ment wari mu rubuga rw’amahina awohereje mu nshundura.
Umunsi wa 17 wa shampiyona usize APR FC ifashe umwanya wa mbere by’agateganyo n’amanota 34, ikaba irusha inota rimwe AS Kigali yatsindiwe na Rwamagana i Ngoma igitego 1-0.
