Kuri iki Cyumweru, Minisiteri y’ububanyi n’amahanga y’u Burusiya yatangaje ko Kiev n’abaterankunga bayo bo mu Burengerazuba bagomba kwemera uruhare rwabo mu gusenya ibitaro by’abasivili muri Donbass. Yongeyeho ko abakoze “icyaha cy’intambara” batazacika igihano .
Minisiteri y’ingabo y’u Burusiya yavuze ko mu gitondo cyo kuri uyu wa Gatandatu ushize, Ingabo za Ukraine zarashe za roketi zikoresheje intwaro ya HIMARS yakozwe na Amerika zibasiye ibitaro byo mu mujyi wa Novoaydar, zihitana abantu 14 abandi 24 barakomereka. Nk’uko igisirikare kibitangaza, ngo iki kigo cyavuraga abaturage baho, ndetse n’abasirikare b’u Burusiya.
Minisiteri y’ububanyi n’amahanga yavuze ko Ukraine yakoresheje ubutasi bw’uburengerazuba hamwe na satelite zikoreshwa n’abanyamuryango ba NATO mu kwibasira ibitaro.
Minisiteri yagize iti: “Kurasa nkana ku bigo nderabuzima bya gisivili bikora no kwica abaturage ku bwende ni ibyaha bikomeye by’intambara byakozwe n’ubutegetsi bwa Kiev hamwe n’ababushinzwe bo mu Burengerazuba.”
Minisiteri yongeyeho ko irimo kubarura neza ibitero byibasira abaturage. Yagize iti: “Ibikorwa by’ubugizi bwa nabi… ntibizasigara bidahanwe.”
Nk’uko biteganywa n’Amasezerano ya Geneve yo mu 1949, impande ziri mu ntambara ntizigomba gutera ibitaro bya gisivili uko byagenda kose nk’uko iyi nkuru dukesh Russi Today ikomeza ivuga.
Novoaydar iri mu birometero mirongo uvuye ahabera urugamba muri Repubulika ya Lugansk (LPR) yatangaje ubwigenge ishyigikiwe n’u Burusiya. Abayobozi b’inzego z’ibanze bashyize ahagaragara amashusho y’inyubako y’ibitaro nyuma gato y’igitero.
Moscou yashinje inshuro nyinshi Kiev kugaba ibitero ku basivili ikoresheje intwaro z’iburengerazuba.
Muri uku kwezi kwonyine, abayobozi bavuze ko ibisasu bya HIMARS byakoreshejwe mu gutera ibitaro bibiri byo mu karere ka Zaporozhye. Aka karere, hamwe na LPR hamwe n’utundi turere twahoze ari utwa Ukraine, twiyometse ku Burusiya nyuma ya referendum yo muri Nzeri umwaka ushize.
