Ambasade y’u Rwanda muri Ethiopia ifatanyije na Komisiyo ya Afurika Yunze Ubumwe, mu mpera z’iki cyumweru bateguye igikorwa cyo kwibuka Jenoside yakorewe Abatutsi ku nshuro ya 23 cyabereye mu murwa mukuru, Addis Abeba.
Iki gikorwa cyabereye ku cyicaro cya Afurika Yunze Ubumwe cyanitabiriwe n’Abanyarwanda baba muri Ethiopia, abahagarariye u Rwanda muri iki gihugu ndetse n’inshuti z’u Rwanda.
Ambasaderi Hope Tumukunde Gasatura, Uhagarariye u Rwanda bihoraho muri Afurika Yunze Ubumwe, Nyakubahwa Thomas Kwesi, Chairman Wungirije wa Afurika Yunze Ubumwe, na Komiseri ushinzwe Ibibazo bya Politiki muri Afurika Yunze Ubumwe, Samate Cessouma Minata, bafatanyije mu gucana urumuri rw’icyizere.
Ambasaderi Tumukunde yishimiye ubushake bwa Komisiyo ya Afurika Yunze Ubumwe n’ubufatanye uyu muryango wagaragaje, yibutsa ko Isi yose ifite inshingano zo kwigira ku byabaye mu Rwanda.
Yasabye kurwanya jenoside n’ingengabitekerezo yayo mu gihe ibyaha bishingiye ku rwango no kutihanganirana bikomeza kwiyongera ku Isi by’umwihariko ku mugabane wa Afurika.
Ambasaderi Tumukunde yagize ati: “ Ubudasa bwakomeje kuba inkomoko y’amakimbirane n’ubwicanyi aho kuba inkomoko y’imbaraga zo kubaka igihugu n’iterambere rirambye .” Yongeyeho ko hagomba kwirindwa abashaka kwuririra kuri ubu budasa mu bihugu byacu bagamije kuzana umwuka mubi hagati y’amoko.
Mu ijambo rye yavugiye muri uyu muhango, Chairman wungirije wa Afurika Yunze Ubumwe, Thomas Kwesi, yavuze ko itariki ya 07 Mata ari itariki y’ububyutse ikomeza kwibutsa inshingano bafite ku buzima no ku kiremwamuntu no gusubiramo ibyo basabwa gukora mu kurinda uburenganzira bwa muntu.
Yakomeje avuga ko imizi y’ingengabitekerezo ya jenoside nta handi wayisanga usibye mu mateka y’ubukoloni na politiki yajyanaga nayo yo gutandukanya abantu ugamije kubayobora.
[xyz-ihs snippet=”google-pub”]
Ijambo rya Kwesi kandi ryari rikubiyemo ubutumwa bw’icyizere bugaragaza ko u Rwanda ari igihugu cyabashije kwikura mu bibazo cyarimo kuri ubu akaba ari urugero rw’ubuyobozi bwiza no gukomeza gutera imbere.
Umuhango wo Kwibuka ku nshuro ya 23 wasojwe no gufata umunota wo kwibuka ubuzima bw’Abanyarwanda basaga miliyoni (1,074,017)bishwe muri Jenoside yakorewe Abatutsi mu Rwanda mu 1994. Nyuma yaho ninjoro, Abanyarwanda baba muri Ethiopia bakaba barateraniye kuri ambasade mu ijoro ryo kwibuka.
Abakeneye ko bwiza.com yazabasura, n’igihe mukeneye ko hari ibitangazwa mu binyamakuru byayo wakwandika kuri E-mail ya meckypro@gmail.com, cyangwa mugahamagara kuri 0784685981.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
